11th FYJC Admission New Rules महाराष्ट्र शासनाच्या शालेय शिक्षण व क्रीडा विभागाने शैक्षणिक वर्ष २०२५-२०२६ पासून इयत्ता ११ वीच्या केंद्रीय ऑनलाइन प्रवेश प्रक्रियेतील अल्पसंख्याक कोट्याबाबत सुधारित सूचना जारी केल्या आहेत. या संदर्भात २३ जून २०२५ रोजी एक शुद्धीपत्रक प्रसिद्ध करण्यात आले आहे. मुंबई उच्च न्यायालयाच्या आदेशानंतर हे बदल करण्यात आले आहेत.
11th FYJC Admission New Rules
उच्च न्यायालयाचा आदेश:
मा. उच्च न्यायालय, मुंबई खंडपीठाने याचिका क्रमांक ७२७३/२०२५ व १७१३३/२०२५ मध्ये १२ जून २०२५ रोजी आदेश दिले आहेत की, अल्पसंख्याक शिक्षण संस्थांमध्ये इयत्ता ११ वीच्या प्रवेशासाठी सामाजिक आरक्षणाचा नियम लागू केला जाऊ नये. या आदेशानंतर शासनाने ६ मे २०२५ रोजीच्या शासन निर्णयात आणि त्यानंतर १० जून २०२५ रोजीच्या शुद्धीपत्रकात सुधारणा करणे आवश्यक असल्याचे नमूद केले आहे.
प्रमुख बदल खालीलप्रमाणे:
सामाजिक आरक्षणातून अल्पसंख्याक संस्था वगळल्या: यापूर्वीच्या नियमांनुसार सामाजिक आरक्षणाच्या सर्व तरतुदी इयत्ता ११ वीच्या प्रवेश प्रक्रियेसाठी लागू होत्या. मात्र, आता अल्पसंख्याक दर्जा प्राप्त शाळा/उच्च माध्यमिक विद्यालय/कनिष्ठ महाविद्यालये वगळता राज्यातील इतर सर्व शाळा/महाविद्यालयांना सामाजिक व समांतर आरक्षणाबाबतच्या सर्व तरतुदी लागू राहतील. याचा अर्थ, अल्पसंख्याक शिक्षण संस्थांमध्ये इयत्ता ११ वीच्या प्रवेशासाठी सामाजिक आरक्षण लागू होणार नाही.
अल्पसंख्याक कोट्यातील जागा गुणवत्तानुसार भरणार: अल्पसंख्याक उच्च माध्यमिक विद्यालय/कनिष्ठ महाविद्यालयांना ५०% अल्पसंख्याक कोटा असेल. या कोट्यातील जागा शाळा व्यवस्थापनास तीन नियमित फेऱ्या संपेपर्यंत गुणवत्तेनुसार भरण्याची मुभा असेल.
रिक्त जागा परत करण्याचा पर्याय ऐच्छिक: पहिल्या फेरीअंती अल्पसंख्याक कोट्यातील जागा रिक्त राहिल्यास, पहिल्या फेरीनंतर अल्पसंख्याक दर्जा प्राप्त संस्थांना उर्वरित जागा परत (प्रत्यार्पित) करण्याची मुभा असेल. दुसऱ्या फेरीच्या वेळी अल्पसंख्याक कोट्यातून अर्ज प्राप्त झाल्यास त्या विद्यार्थ्यांना प्रथम प्रवेश अल्पसंख्याक कोट्यातून देण्यात येतील आणि त्यानंतर रिक्त असलेल्या जागा सर्वसाधारण कोट्यात परत करण्याची मुभा महाविद्यालयांना असेल. तथापि, उर्वरित जागा परत करणे पूर्णतः ऐच्छिक असून कोणत्याही अल्पसंख्याक संस्थेवर बंधनकारक नसेल.
माहिती अपलोड करणे बंधनकारक: भरलेल्या जागांची माहिती संकेतस्थळावर अपलोड करण्यासाठीच्या सूचना वेळोवेळी देण्यात येतील आणि त्यानुसार कार्यवाही करणे व्यवस्थापनास बंधनकारक असेल.
रिक्त जागा भरण्याचे नियम: अल्पसंख्याक कोट्यातील प्रवेश क्षमतेपेक्षा कमी प्रवेश झाल्यास उर्वरित रिक्त जागा चौथी नियमित फेरी सुरू होण्यापूर्वी परत करता येतील. अल्पसंख्याक विभागाच्या १८ जून २०१४ च्या शासन निर्णयानुसार, धार्मिक व भाषिक अल्पसंख्याक कोट्यातील प्रवेश करताना त्या-त्या समूहातील विद्यार्थ्यांना गुणवत्तेनुसार प्रवेश द्यावेत. त्या समूहातील विद्यार्थी उपलब्ध न झाल्यास धार्मिक व भाषिक दर्जानुसार अंतर्गत बदल करून प्रवेश करता येतील. महत्त्वाचे म्हणजे, अल्पसंख्याक दर्जा प्राप्त शाळा/उच्च माध्यमिक विद्यालय/कनिष्ठ महाविद्यालयांमध्ये जागा केवळ गुणवत्तेनुसार भरण्यात येतील.
अधिक माहितीसाठी : शासन शुद्धीपत्रक
अधिकृत वेबसाईट : https://mahafyjcadmissions.in/
