‘समग्र शिक्षा’ (Samagra Shiksha Abhiyan) योजनेंतर्गत कार्यरत असलेल्या राज्यातील कंत्राटी कर्मचाऱ्यांच्या विविध मागण्या आणि प्रश्नांसंदर्भात शिफारशी करण्यासाठी गठीत करण्यात आलेल्या समितीच्या कार्यकाळात महाराष्ट्र शासनाने महत्त्वपूर्ण वाढ केली आहे. शालेय शिक्षण व क्रीडा विभागाने यासंबंधीचा SSA Contract Staff GR दिनांक १२ नोव्हेंबर २०२५ रोजी जारी केला आहे.
समितीस तीन आठवड्यांची वाढ
करार कर्मचाऱ्यांच्या समायोजनासह इतर प्रश्नांचा अभ्यास करण्यासाठी गठीत करण्यात आलेल्या या समितीला दिनांक ०४ नोव्हेंबर २०२५ पासून तीन आठवड्यांची मुदतवाढ देण्यात आली आहे.
यापूर्वी समितीला दिनांक १० सप्टेंबर २०२५ च्या शासन निर्णयानुसार दोन महिन्यांची मुदतवाढ देण्यात आली होती. ती मुदत दिनांक ०३ नोव्हेंबर २०२५ रोजी संपुष्टात आली होती.
त्यामुळे समितीचा अहवाल अंतिम करण्यासाठी आणि तो शासनाला सादर करण्याच्या कार्यवाहीसाठी ही मुदतवाढ देण्यात आली आहे.
समिती स्थापनेची पार्श्वभूमी
‘समग्र शिक्षा’ योजनेंतर्गत कार्यरत कंत्राटी कर्मचाऱ्यांच्या समस्या सोडवण्यासाठी ही समिती गठीत करण्यात आली आहे.
मा. मुख्यमंत्री महोदय यांच्या अध्यक्षतेखाली दिनांक २२ जुलै २०२४ रोजी सह्याद्री अतिथीगृह, मुंबई येथे या कर्मचाऱ्यांच्या विविध प्रश्नांवर बैठक आयोजित करण्यात आली होती.
या बैठकीत मुख्यमंत्री महोदयांनी कर्मचाऱ्यांच्या प्रश्नांवर शासनास शिफारशी करण्यासाठी समिती गठीत करण्याचे निर्देश दिले होते.
त्यानुसार, दिनांक ०४ जून २०२५ रोजीच्या शासन निर्णयान्वये या समितीची पुनर्रचना करण्यात आली. या समितीमध्ये विविध राजकीय नेते, प्रशासकीय अधिकारी आणि करार कर्मचारी संघटनांचे प्रतिनिधी यांचा समावेश आहे.
समितीचे नेमके कार्य काय?
या ‘SSA Contract Staff GR’ मध्ये समितीच्या कामाचे स्वरूप स्पष्ट करण्यात आले आहे. समितीने ‘समग्र शिक्षा’ योजनेंतर्गत कार्यरत असणाऱ्या करार कर्मचाऱ्यांची नियुक्ती, मानधन व अन्य सेवाशर्ती याबाबत परिपूर्ण अभ्यास करायचा आहे.
कर्मचाऱ्यांचे शासन सेवेत समायोजन आणि अन्य प्रश्नांबाबत इतर राज्यांमध्ये याच योजनेंतर्गत कार्यरत कंत्राटी कर्मचाऱ्यांची नियुक्ती, मानधन आणि सेवाशर्ती यांचा अभ्यास करणे देखील समितीच्या कार्यात समाविष्ट आहे.
अभ्यास पूर्ण झाल्यावर समितीने आपला अहवाल सर्व सन्माननीय सदस्यांना अवगत करून तो शासनास सादर करणे अनिवार्य आहे.
समितीच्या पुनर्रचनेनंतरचा ‘SSA Contract Staff GR’ दिनांक ०४ जून २०२५ रोजी गठीत करण्यात आलेल्या समितीचे अध्यक्ष श्री. संतोष कुमार, अपर मुख्य सचिव तथा विशेष कार्य अधिकारी (अपील व रिव्हीजन), मंत्रालय, मुंबई हे आहेत. तसेच, राज्य प्रकल्प संचालक (समग्र शिक्षा), महाराष्ट्र प्राथमिक शिक्षण परिषद, मुंबई हे सदस्य सचिव म्हणून कार्यभार सांभाळत आहेत.
हा महत्त्वाचा शासन निर्णय महाराष्ट्र शासनाच्या www.maharashtra.gov.in या संकेतस्थळावर उपलब्ध करण्यात आला आहे.
या मुदतवाढीमुळे, ‘समग्र शिक्षा’ योजनेंतर्गत कार्यरत कंत्राटी कर्मचाऱ्यांच्या आशा पल्लवित झाल्या असून, समिती लवकरात लवकर आपला अभ्यास पूर्ण करून शासनाला योग्य शिफारशी करेल, अशी अपेक्षा आहे.
अधिक महितीसाठी : शासन निर्णय वाचा
