Unified Pension Scheme Nps Switch Option: UPS मधून पुन्हा NPS मध्ये जाण्याचा ‘वन-टाइम’ पर्याय उपलब्ध झाला आहे. जाणून घ्या या महत्त्वाच्या निर्णयाबद्दल सविस्तर
Unified Pension Scheme Nps Switch Option
केंद्र सरकार आणि पेन्शन निधी नियामक आणि विकास प्राधिकरणाने (PFRDA) राष्ट्रीय पेन्शन प्रणाली (NPS) मध्ये असलेल्या कर्मचाऱ्यांसाठी एक महत्त्वाचा निर्णय घेतला आहे.
या निर्णयानुसार, ज्या कर्मचाऱ्यांनी युनिफाइड पेन्शन स्कीम (UPS) निवडली होती, त्यांना आता पुन्हा NPS मध्ये परत येण्याचा एक विशेष, एकदाच वापरता येणारा पर्याय उपलब्ध करून देण्यात आला आहे.
या संदर्भात, महाराष्ट्र शासनाच्या सामान्य प्रशासन विभागाने एक परिपत्रक जारी केले आहे, ज्यात या बदलाची माहिती देण्यात आली आहे.
UPS निवडलेल्या कर्मचाऱ्यांसाठी महत्त्वाचे बदल
यापूर्वी, 20 जानेवारी 2025 च्या अधिसूचनेनुसार, एकदा UPS निवडल्यानंतर तो निर्णय अंतिम मानला जात होता. परंतु, 25 ऑगस्ट 2025 रोजी जारी झालेल्या कार्यालयीन ज्ञापनानंतर यात बदल करण्यात आला आहे. यानुसार, हा बदल ‘एक-मार्गी आणि एक-वेळची’ सुविधा म्हणून उपलब्ध करण्यात आला आहे.
या योजनेतील महत्त्वाचे मुद्दे:
- निवड करण्याची अट: UPS मधून पुन्हा NPS मध्ये जाण्याचा हा पर्याय कर्मचाऱ्याला त्याच्या सेवानिवृत्तीच्या एक वर्षापूर्वी किंवा ऐच्छिक सेवानिवृत्तीच्या तीन महिन्यांपूर्वी निवडता येईल.
- अपवादात्मक स्थिती: ज्या कर्मचाऱ्यांवर शिस्तभंगाची कारवाई चालू आहे किंवा ज्यांना सेवेतून बडतर्फ करण्यात आले आहे, त्यांना हा पर्याय मिळणार नाही.
- UPS चे फायदे संपुष्टात: एकदा हा पर्याय निवडल्यावर, कर्मचाऱ्याला UPS चे फायदे आणि ‘अशूअर्ड पेआउट्स’ (Assured Payouts) मिळणे बंद होईल.
- सरकारी योगदानाचे काय?: सरकारने UPS मध्ये केलेले 4% अतिरिक्त योगदान कर्मचाऱ्याच्या NPS खात्यात जमा केले जाईल.
केंद्र सरकारने जारी केलेले हे कार्यालयीन ज्ञापन सर्व संबंधित अधिकाऱ्यांच्या निदर्शनास आणले आहे. हे परिपत्रक महाराष्ट्र शासनाच्या www.maharashtra.gov.in या संकेतस्थळावर उपलब्ध आहे.
