शालेय आणि महाविद्यालयीन विद्यार्थी-विद्यार्थिनींच्या एसटी प्रवासातील अडचणी सोडवण्यासाठी महाराष्ट्र राज्य मार्ग परिवहन महामंडळाने (MSRTC) एक समर्पित हेल्पलाईन क्रमांक सुरू केला आहे. परिवहन मंत्री तथा एसटी महामंडळाचे अध्यक्ष प्रताप सरनाईक यांनी ही माहिती दिली असून, विद्यार्थी-विद्यार्थिनींना तातडीने मदत मिळावी, हा यामागचा मुख्य उद्देश आहे.
लाखो विद्यार्थी दररोज शाळा आणि महाविद्यालयात जाण्यासाठी एसटी बसचा वापर करतात. राज्य शासन मासिक पासमध्ये ६६.६६% सवलत देते, तर ‘पुण्यश्लोक अहिल्याबाई होळकर योजने’ अंतर्गत बारावीपर्यंतच्या मुलींना मोफत मासिक पास दिला जातो. मात्र, काही ठिकाणी विद्यार्थ्यांना एसटी सेवेमध्ये अनेक समस्यांचा सामना करावा लागतो.
विद्यार्थ्यांना भेडसावणाऱ्या समस्यांवर तोडगा
मंत्री सरनाईक यांनी नुकतीच धाराशिव मध्यवर्ती बसस्थानकाला भेट दिली असता, उपस्थित शालेय विद्यार्थी-विद्यार्थिनींनी त्यांच्या समस्या मांडल्या. बस वेळेवर न सुटणे, गर्दीमुळे थांब्यावर न थांबणे, बसेस उशिरा येणे किंवा अचानक रद्द होणे यामुळे अनेक विद्यार्थ्यांचे शैक्षणिक नुकसान होत असल्याची तक्रार त्यांनी केली. संध्याकाळच्या वेळी बस वेळेवर न मिळाल्याने विद्यार्थ्यांना घरी पोहोचण्यास खूप उशीर होतो.
या सर्व गंभीर तक्रारींची दखल घेत, विद्यार्थी-विद्यार्थिनींना प्रवासात अडचण आल्यास किंवा बसेस वेळेवर न आल्यास त्वरित मदत मिळावी, यासाठी MSRTC School Bus Helpline Number 1800 221 251 हा टोल-फ्री क्रमांक सुरू करण्यात आला आहे.
बस उशिरा सुटणे, अचानक रद्द होणे किंवा तांत्रिक बिघाडामुळे अडचण आल्यास विद्यार्थी या क्रमांकावर संपर्क साधू शकतात.
थेट विभाग नियंत्रकांना संपर्क साधण्याची सोय
हेल्पलाईन क्रमांकासोबतच, राज्यातील ३१ विभागांतील सर्व विभाग नियंत्रकांचे दूरध्वनी संपर्क क्रमांक शाळा-महाविद्यालयांना देण्यात येत आहेत.
यामुळे आपत्कालीन परिस्थितीत प्राचार्य, मुख्याध्यापक तसेच थेट विद्यार्थी-विद्यार्थिनी देखील विभाग नियंत्रकांना संपर्क साधून आपल्या समस्या मांडू शकतील.
शैक्षणिक नुकसान झाल्यास अधिकाऱ्यांवर कठोर कारवाई
एसटी बसेसच्या गैरव्यवस्थापनामुळे विद्यार्थ्यांचे तास चुकल्यास किंवा महत्त्वाच्या परीक्षा चुकल्यास होणाऱ्या शैक्षणिक नुकसानीला संबंधित आगाराचे व्यवस्थापक आणि त्यांचे पर्यवेक्षक जबाबदार असतील, असे स्पष्ट निर्देश मंत्री श्री. सरनाईक यांनी दिले आहेत.
या समस्येवर तातडीने उपाययोजना करण्यासाठी, सोमवारी ते शुक्रवारी संध्याकाळी ५ ते ६ या वेळेत (शाळा सुटण्याची वेळ) मुख्य बसस्थानक आणि विद्यार्थ्यांची जास्त गर्दी असलेल्या थांब्यांवर संबंधित आगाराच्या पर्यवेक्षकांनी गणवेशात उपस्थित राहून वाहतुकीचे नियोजन करावे.
‘शाळेचा शेवटचा मुलगा अथवा मुलगी बसने सुखरूप घरी जाईपर्यंत पर्यवेक्षकांनी तेथून हलू नये,’ अशा कडक सूचना एसटी प्रशासनाला देण्यात आल्या आहेत.
जर विद्यार्थ्यांचे शैक्षणिक नुकसान झाल्याची लेखी तक्रार विद्यार्थी किंवा शाळा-महाविद्यालयाच्या मुख्याध्यापकांनी केली, तर जितके दिवस विद्यार्थ्यांचे नुकसान झाले, तितके दिवस जबाबदार पर्यवेक्षक किंवा अधिकाऱ्यांना निलंबित केले जाईल किंवा सक्तीच्या रजेवर पाठवण्यात येईल.
MSRTC School Bus Helpline Number
या निर्णयामुळे एसटी सेवा अधिक कार्यक्षम होईल, अशी अपेक्षा आहे. विद्यार्थ्यांसाठी हा MSRTC School Bus Helpline Number 1800 221 251 अत्यंत महत्त्वाचा ठरणार आहे.
माहितीसाठी: विद्यार्थी-विद्यार्थिनी आणि पालकांनी कृपया ‘MSRTC School Bus Helpline Number’ 1800 221 251 लक्षात ठेवावा.
