YCMOU Assignment: यशवंतराव चव्हाण महाराष्ट्र मुक्त विद्यापीठ (Yashwantrao Chavan Maharashtra Open University – YCMOU) परीक्षा विभागाने हिवाळी परीक्षा डिसेंबर २०२५ / जानेवारी २०२६ च्या अनुषंगाने पदवी (UG) आणि पदव्युत्तर (PG) शिक्षणक्रमांच्या नियमित तसेच पुनर्परीक्षार्थी (Repeater) विद्यार्थ्यांसाठी एक महत्त्वाचे परिपत्रक जारी केले आहे. यानुसार, संबंधित अभ्यासक्रमांचे गृहपाठ (Home Assignment) आता ऑनलाईन पद्धतीने सादर करावे लागणार आहेत.
ऑनलाईन गृहपाठ सादर करण्याचे वेळापत्रक
विद्यार्थी आणि अभ्यासकेंद्रांसाठी ऑनलाईन गृहपाठ (Online Home Assignment) सादर करणे आणि तपासणीसाठी खालीलप्रमाणे कालावधी निश्चित करण्यात आला आहे.
- विद्यार्थ्यांनी गृहपाठ अपलोड करणे : दि. १५/१२/२०२५
- विद्यार्थ्यांनी अपलोड केलेले गृहपाठ अभ्यासकेंद्रांनी पडताळणी करणे : दि. १८/१२/२०२५
- समंत्रकांनी गृहपाठ तपासणी करणे : दि. २८/१२/२०२५
YCMOU Assignment: गृहपाठ ऑनलाईन अपलोड करण्याची कार्यपद्धती
विद्यार्थ्यांना त्यांचे हस्तलिखित गृहपाठ (Home Assignment) विद्यापीठाच्या पोर्टलवर ऑनलाईन पद्धतीने अपलोड करायचे आहेत.
मार्गदर्शक सूचना: पोर्टलवर उपलब्ध असलेले Student User Guide सविस्तर वाचणे महत्त्वाचे आहे. नोंदणी, अपलोडिंग, रि-सबमिशन (पुन्हा सादर करणे) यांसारख्या सर्व प्रक्रिया नेमून दिलेल्या कालावधीतच पूर्ण कराव्या लागतील, कारण विहित कालावधीनंतर सॉफ्टवेअर लॉक होईल.
प्रश्नपत्रिका: विद्यार्थ्यांच्या लॉगिनमध्येच गृहपाठाकरिता विषयवार प्रश्न उपलब्ध करून देण्यात आलेले आहेत.
प्रोफाइल पेज आणि बारकोड: यशस्वी लॉगिन झाल्यावर विद्यार्थ्यांचे प्रोफाइल दिसेल. या प्रोफाइल पेजची प्रिंट काढावी लागते. यासोबतच बारकोड असलेले कोरे पान (Blank Page) देखील उपलब्ध असेल, ज्याच्या आवश्यकतेनुसार प्रिंट्स काढाव्या लागतील.
गृहपाठ लिहिण्यासाठी केवळ आणि केवळ आपल्या लॉगिनमध्ये उपलब्ध असलेल्या बारकोड प्रिंट केलेल्या पानांचाच वापर करणे बंधनकारक आहे.
अपलोडिंग आणि ABC ID: गृहपाठ लिहून झाल्यावर, प्रत्येक विषयाचे गृहपाठ त्या-त्या विषयाच्या प्रोफाइल पेजच्या प्रिंटसह पोर्टलवर अपलोड करावे लागतील. अपलोड करताना ABC ID नमूद करणे आवश्यक आहे. ज्या विद्यार्थ्यांनी ABC ID तयार केलेला नाही, त्यांच्यासाठी पोर्टलवर ही सुविधा उपलब्ध आहे.
PDF चे नियम:
- तयार केलेली PDF चांगल्या प्रतीची, सुस्पष्ट स्कॅन केलेली आणि वाचनीय असावी.
- PDF करताना पानांचा क्रम योग्य असावा आणि पाने वेडीवाकडी नसावीत.
- प्रत्येक पानाची साईज किमान 3MB आणि सर्व पाने मिळून जास्तीत जास्त 20MB पेक्षा अधिक नसावी.
उत्तर लेखनाचे नियम: प्रश्नाचे उत्तर लिहिताना प्रत्येक प्रश्न स्वतंत्र पानावर लिहावा. सर्व गृहपाठांची उत्तरे मुद्देसूद आणि कमीत कमी शब्दांत, जास्तीत जास्त ४ ते ५ पानांमध्ये पूर्ण करणे अपेक्षित आहे.
गैरहजेरीची नोंद: जे विद्यार्थी विहित मुदतीत गृहपाठ अपलोड करणार नाहीत, त्यांची अनुपस्थिती (AB) दर्शवून निकाल जाहीर केला जाईल.
संकेतस्थळ आणि नोंदणी: गृहपाठ अपलोड करण्यासाठी विद्यार्थ्यांनी https://asm.ycmou.org.in/ या संकेतस्थळाला भेट देऊन प्रथम नोंदणी करणे आवश्यक आहे. नोंदणीसाठी १६ अंकी PRN (Permanent Registration Number) चा उपयोग करावा.
महत्त्वाचे: अस्वीकृती आणि पुनर्सादरता (Rejection and Re-Submission)
अस्वीकृतीची कारणे: विद्यार्थ्यांनी अपलोड केलेले गृहपाठ वाचनीय नसल्यास, विषयानुसार अपलोड न केल्यास, वेडीवाकडी/ब्लर स्कॅनिंग असलेली पाने किंवा कोरी पाने आढळल्यास, ते गृहपाठ अस्वीकृत (Reject) केले जातील.
पुन्हा सादर करणे: अस्वीकृत झालेले गृहपाठ विद्यार्थ्यांच्या लॉगिनला पुन्हा रि-सबमिशनसाठी उपलब्ध होतील. ही प्रक्रियादेखील विहित कालावधीतच पूर्ण करावी लागेल. वेळेत रि-सबमिशन न केल्यास अंतर्गत गुणांच्या (CA) रकान्यात Absent (Ab) दिसेल.
विद्यार्थ्यांनी त्यांच्या प्रोफाइल आणि ईमेलवर वेळोवेळी अपडेट्स तपासणे आवश्यक आहे.
YCMOU Assignment कोणासाठी ऑनलाईन गृहपाठ?
शैक्षणिक वर्ष २०२५-२६ मध्ये प्रवेशित असलेल्या जानेवारी २०२५ आणि जुलै २०२५ सत्रातील विद्यार्थ्यांसाठी हे नियम लागू आहेत.
NEP 2020 अंतर्गत शिक्षणक्रम: राष्ट्रीय शैक्षणिक धोरण २०२० (NEP 2020) अंतर्गत येणाऱ्या सर्व पदव्युत्तर (PG) तसेच पदवी (UG) शिक्षणक्रमांच्या सर्व सत्रांतील नियमित आणि पुनर्परीक्षार्थी विद्यार्थ्यांसाठी ऑनलाईन गृहपाठ (Online Home Assignment) कार्यपद्धती आहे.
केवळ याच शिक्षणक्रमांसाठी: विद्यार्थ्यांनी https://asm.ycmou.org.in/ या संकेतस्थळावरील “List of Courses enabled for submission of Assignments Online” या यादीतील शिक्षणक्रमांचेच गृहपाठ ऑनलाईन पद्धतीने अपलोड करायचे आहेत.
ज्या शिक्षणक्रमांची नावे या यादीत नाहीत, त्या विद्यार्थ्यांनी विद्यापीठाच्या प्रचलित कार्यपद्धतीनेच गृहपाठ सादर करावेत. तसेच, बंद झालेल्या शिक्षणक्रमांसाठी द्वितीय वर्षास किंवा इतर वर्षास प्रवेश घेतलेल्या विद्यार्थ्यांनी मागील वर्षाच्या प्रश्नपत्रिका वापरून गृहपाठ लिहून पूर्वीच्या प्रचलित पद्धतीप्रमाणे अभ्यासकेंद्रावर जमा करावेत.
यशवंतराव चव्हाण महाराष्ट्र मुक्त विद्यापीठाने (YCMOU) डिजिटल शिक्षणाच्या दिशेने आणखी एक पाऊल टाकले आहे. सर्व संबंधित विद्यार्थ्यांनी या सूचनांचे काटेकोर पालन करून वेळेत आपले YCMOU Assignment पूर्ण करावेत, जेणेकरून कोणत्याही शैक्षणिक नुकसानीला सामोरे जावे लागणार नाही. ऑनलाईन गृहपाठ (Online Home Assignment) प्रक्रिया यशस्वीपणे पूर्ण करण्यासाठी विद्यापीठाने शुभेच्छा दिल्या आहेत.
अधिक माहितीसाठी : https://ycmou.digitaluniversity.ac/
