राज्यातील महसूल विभागाअंतर्गत काम करणाऱ्या हजारो अधिकारी आणि कर्मचाऱ्यांसाठी एक अत्यंत महत्वाची अपडेट आहे. राज्याचे महसूल मंत्री चंद्रशेखर बावनकुळे यांनी नुकतीच मंत्रालयात कर्मचारी संघटनांसोबत महत्त्वपूर्ण बैठक घेतली. या बैठकीत त्यांनी Bhumi Abhilekh विभाग आणि नोंदणी व मुद्रांक विभागातील कर्मचाऱ्यांच्या प्रलंबित मागण्यांवर तातडीने आणि सकारात्मक तोडगा काढण्याचे आश्वासन दिले आहे. सविस्तर बैठकीतील मुद्दे पाहूया.
भूमी अभिलेख विभागाच्या कर्मचाऱ्यांच्या मागण्यांचा सकारात्मक विचार करणार
भूमी अभिलेख कर्मचाऱ्यांना जमिनीच्या मोजणीसाठी अजूनही जुन्या पद्धतीचा वापर होत असल्याने कर्मचाऱ्यांवर ताण येतो. हे लक्षात घेऊन महसूल मंत्र्यांनी Bhumi Abhilekh विभागातील कर्मचाऱ्यांसाठी जमीन मोजणीची अत्याधुनिक साधनसामग्री उपलब्ध करून देण्याच्या सूचना दिल्या आहेत.
विशेष म्हणजे, या विभागातील ‘भू-करमापक’ पदाच्या वेतनश्रेणीबाबतचा प्रश्न अनेक दिवसांपासून प्रलंबित होता. आता यावर विशेष बाब म्हणून मंत्रिमंडळ स्तरावर प्रस्ताव सादर केला जाणार आहे, त्यामुळे कर्मचाऱ्यांच्या वेतनात वाढ होण्याची दाट शक्यता आहे.
इतकेच नव्हे तर, तलाठी संवर्गाला ज्याप्रमाणे प्रवास भत्ता मिळतो, त्याच धर्तीवर Bhumi Abhilekh विभागातील कर्मचाऱ्यांनाही प्रवास भत्ता देण्याबाबत शासन सकारात्मक विचार करत असल्याचे बावनकुळे यांनी स्पष्ट केले.
पदोन्नती आणि भरती प्रक्रियेला वेग बैठकीत कर्मचाऱ्यांच्या पदोन्नती, आकृतीबंध, अनुकंपा तत्त्वावरील भरती आणि सरळसेवा भरती यांसारख्या प्रशासकीय विषयांवरही सविस्तर चर्चा झाली. विभागाने यावर कासवगतीने काम न करता गतीने कार्यवाही करावी, असे स्पष्ट निर्देश मंत्र्यांनी दिले आहेत. कर्मचाऱ्यांची सेवाज्येष्ठता यादी आणि त्यांना आवश्यक प्रशिक्षण देण्यावरही भर देण्यात येणार आहे.
नोंदणी व मुद्रांक विभागाकडील अधिकारी कर्मचाऱ्यांचे सेवा विषयक प्रश्न प्राधान्याने सोडविणार
दुसऱ्या एका बैठकीत नोंदणी व मुद्रांक विभागाच्या प्रश्नांवरही चर्चा झाली. महसूल विभागाप्रमाणेच या विभागातील कर्मचाऱ्यांच्या पदांची नावे (Designation) बदलण्याबाबत प्रस्ताव तयार करण्यास सांगण्यात आले आहे.
तसेच, जी कार्यालये सध्या भाड्याच्या किंवा खासगी जागेत आहेत, ती शासकीय जागेत स्थलांतरित करण्यासाठी जिल्हावार आराखडा तयार करण्याचे आदेश देण्यात आले आहेत.
अधिकाऱ्यांना कामात संरक्षण मिळावे म्हणून एक महत्त्वपूर्ण निर्णय या वेळी घेण्यात आला. एखाद्या दस्त नोंदणीप्रकरणी अधिकाऱ्यावर गुन्हा दाखल करण्यापूर्वी नोंदणी महानिरीक्षकांची माहिती घेणे आवश्यक असेल.
तसेच त्रयस्थ व्यक्तीने तक्रार केल्यास, त्याची पडताळणी करण्यासाठी मार्गदर्शक तत्वे (Guidelines) जारी केली जातील, जेणेकरून कोणत्याही अधिकाऱ्याला नाहक त्रास होणार नाही.
एकंदरीत, महसूल विभागातील Bhumi Abhilekh आणि नोंदणी विभागातील कर्मचाऱ्यांना आता या आश्वासनांची अंमलबजावणी किती वेगाने होते, याकडे सर्वांचे लक्ष लागले आहे.
