Ladki Bahin Loan Yojana लाडकी बहीण योजनेच्या लाभार्थी महिलांसाठी आनंदाची बातमी आहे! अण्णासाहेब पाटील आर्थिक विकास महामंडळ आणि इतर दोन महामंडळांच्या वैयक्तिक व गट कर्ज व्याज परतावा योजनेतील महिलांना आता व्यवसाय सुरू करण्यासाठी विशेष कर्ज धोरण राबवण्यात येणार आहे.
मुंबई जिल्हा मध्यवर्ती सहकारी बँकेच्या मदतीने ही योजना सुरू होणार असून, यासंदर्भात सामंजस्य करार करण्याचे निर्देश महिला व बालविकास मंत्री आदिती तटकरे यांनी दिले आहेत.
हा करार झाल्यास मुंबईतील महिलांना आर्थिकदृष्ट्या सक्षम होण्यासाठी मोठा आधार मिळेल. मंत्री तटकरे यांनी मंत्रालयात आयोजित केलेल्या बैठकीत हे महत्त्वाचे निर्देश दिले. यावेळी मुंबई बँकेचे अध्यक्ष प्रवीण दरेकर, आमदार चित्रा वाघ आणि इतर वरिष्ठ अधिकारी उपस्थित होते.
महिलांना मिळणार लाडकी बहीण योजनेचा लाभ
- मंत्री आदिती तटकरे यांनी सांगितले की, मुंबई बँकेला व्याज परतावा योजनांसाठी प्राधिकृत करून तातडीने सामंजस्य करार करण्यात यावा.
- या महामंडळांच्या व्याज परतावा योजनेतील महिलांना ‘लाडकी बहीण योजने’ अंतर्गत लाभ मिळणार असल्याने त्यांना योजनेसाठी अपात्र ठरवता येणार नाही.
- मुंबई बँकेच्या या विशेष उपक्रमांतर्गत महिलांना ₹१ लाख पर्यंत कर्ज उपलब्ध होईल. यातून १० महिलांचा गट एकत्र येऊन व्यवसाय सुरू करू शकतो.
मुंबई बँकेची ‘लाडकी बहीण योजना’
- मुंबई बँकेने ‘लाडकी बहीण योजना’ अंतर्गत ५३,३५७ महिलांची झिरो बॅलन्स खाती उघडली आहेत.
- या योजनेत पात्र महिलांच्या खात्यात शासनाकडून दरमहा ₹१५०० थेट जमा होत आहेत.
- या महिलांना आता मुंबई बँकेच्या या उपक्रमाचाही लाभ घेता येणार आहे.
अंगणवाडी बांधकामात एकसमानता
मंत्री तटकरे यांनी या बैठकीत अंगणवाडी बांधकामासंदर्भातही महत्त्वाचे निर्देश दिले. राज्यातील अंगणवाड्यांच्या बांधकामात एकसमानता असावी आणि आधुनिक तंत्रज्ञानाचा वापर करावा, असे त्यांनी सांगितले. अंगणवाड्यांमध्ये ऊर्जा बचतीसाठी सौर ऊर्जेला प्राधान्य देण्याचेही निर्देश त्यांनी दिले.
या योजनेसंदर्भात अधिक माहितीसाठी किंवा अर्ज करण्याच्या प्रक्रियेबद्दल जाणून घेण्यासाठी https://udyog.mahaswayam.gov.in महामंडळाच्या अधिकृत संकेतस्थळाला भेट द्या.
