MH ESI Society: महाराष्ट्र राज्य कामगार विमा सोसायटीच्या (MH-ESIS) माध्यमातून विमाधारकांना दिल्या जाणाऱ्या आरोग्य सेवांचा आढावा दिनांक 22 जानेवारी रोजी घेण्यात आला. सार्वजनिक आरोग्य विभागाचे सचिव आणि सोसायटीच्या कार्यकारी समितीचे अध्यक्ष मा. श्री. ई. रविंद्रन यांनी हा आढावा घेतला. विमाधारकांना मिळणाऱ्या वैद्यकीय सुविधांचा दर्जा सुधारण्यासोबतच रुग्णालयातील IPD (अंतरुग्ण विभाग) आणि OPD (बाह्यरुग्ण विभाग) संख्या वाढवण्यावर विशेष लक्ष देण्याचे निर्देश त्यांनी यावेळी दिले.
मंत्रालयातून व्हिडिओ कॉन्फरन्सिंगद्वारे (VC) आयोजित या बैठकीत आयुक्त श्री. रमेश चव्हाण (भा.प्र.से.), प्रशासन संचालक श्री. सोहम वायाळ, वैद्यकीय संचालक डॉ. अशोक थोरात यांच्यासह राज्यातील सर्व वैद्यकीय अधीक्षक आणि प्रशासकीय अधिकारी उपस्थित होते.
बैठकीतील महत्त्वाचे मुद्दे
सेवा विस्तार: विमाधारकांना जास्तीत जास्त चांगल्या आरोग्य सुविधा उपलब्ध करून देण्यासाठी रुग्णालयांनी आक्रमक प्रयत्न करावेत. विशेषतः प्रसुतींच्या संख्येत वाढ करण्यावर भर द्यावा.
कामगार मार्गदर्शिका २०२६: आरोग्य मंत्री श्री. प्रकाश आबिटकर यांच्या सूचनेनुसार प्रथमच ‘कामगार मार्गदर्शिका-२०२६’ तयार करण्यात आली आहे. यामुळे कामगारांना कोणत्या रुग्णालयात, कोणत्या दिवशी कोणते आरोग्य उपक्रम राबवले जाणार आहेत, याची आगाऊ माहिती मिळणे सोपे होईल.
सुविधांचे जाळे: सादरीकरणादरम्यान सांगण्यात आले की, सध्या १२ सरकारी रुग्णालये, १११ सेवा दवाखाने, ३१२ खाजगी टाय-अप रुग्णालये (सेकंडरी सेवा), आणि १४० अतिविशिष्ट (Super-specialty) रुग्णालयांच्या माध्यमातून विमाधारकांना सेवा दिली जात आहे.
अभिप्राय मागवले: विमाधारकांना आणखी कोणत्या प्रगत सुविधा देता येतील, याबाबत सर्व वैद्यकीय अधीक्षकांनी पुढील २ दिवसांत आपला लेखी अभिप्राय सादर करावा, असे आदेश मा. सचिवांनी दिले.
यावेळी मा. सचिवांनी विमा सोसायटीच्या कामकाजाबद्दल समाधान व्यक्त केले. बैठकीचा समारोप करताना आयुक्त श्री. रमेश चव्हाण यांनी सर्वांचे आभार मानले.
राज्यातील 48 लाख विमा धारक कामगारांसाठी ‘कामगार मार्गदर्शिका 2026’ प्रसिद्ध, मिळणार हे फायदे!
