Kendrapramukh Bharti Update : महाराष्ट्र शासनाच्या शिक्षण विभागाने राज्यातील ४८६० समूह साधन केंद्र समन्वयक (केंद्रप्रमुख) मंजूर पदांपैकी रिक्त असलेल्या पदांच्या भरतीसाठी मार्गदर्शक सूचना जारी केल्या आहेत. या पदांसाठीची निवड प्रक्रिया, पात्रता आणि आरक्षणाबद्दल सविस्तर माहिती जाणून घ्या.
Kendrapramukh Bharti Update समूह साधन केंद्र समन्वयक (केंद्रप्रमुख) पदांच्या भरतीसाठी मार्गदर्शक सूचना जारी
महाराष्ट्र शासनाच्या शालेय शिक्षण व क्रीडा विभागाने राज्यातील शिक्षण व्यवस्थेतील एक महत्त्वाचे पद असलेल्या समूह साधन केंद्र समन्वयक (केंद्रप्रमुख) पदांच्या भरतीसाठी मार्गदर्शक सूचना जारी केल्या आहेत. या निर्णयानुसार, राज्यातील सर्व जिल्हा परिषदांमध्ये एकूण ४८६० पदे मंजूर असून, सद्यस्थितीत रिक्त असलेल्या पदांची भरती ही पदोन्नती आणि मर्यादित विभागीय स्पर्धा परीक्षा अशा दोन मार्गांनी ५०:५० या प्रमाणात होणार आहे.
या पदाचे जुने नाव ‘केंद्रप्रमुख’ असून, आता ते ‘समूह साधन केंद्र समन्वयक’ असे बदलण्यात आले आहे. पदनाम बदलले असले तरी पदासाठीची पूर्वीचीच पात्रता आणि नेमणुकीची पद्धत लागू असणार आहे.
समूह साधन केंद्र समन्वयक (केंद्र प्रमुख) मर्यादित विभागीय स्पर्धा परीक्षा- २०२५
Kendrapramukh Bharti Update: महाराष्ट्र शासनाच्या शासन पत्र क्र. संकिर्ण २०२२/प्र.क्र. ८१/ टीएनटी ९., दि. १५/०९/२०२२ व शासन निर्णय दि. २९/०८/२०२५ अन्वये महाराष्ट्र राज्यातील सर्व जिल्हापरिषद मधील कार्यरत प्राथमिक शिक्षकांना केंद्रप्रमुख पदावर विभागीय मर्यादित स्पर्धा परीक्षेद्वारे नियुक्ती देण्यासाठी “समूह साधन केंद्र समन्वयक (केंद्र प्रमुख) मर्यादित विभागीय स्पर्धा परीक्षा-२०२५” या परीक्षेचे ऑनलाईन पध्दतीने दि. ०१/१२/२०२५ ते ०५/१२/२०२५ या कालावधीत आयोजन करण्यात येणार आहे.
परीक्षेबाबतचे अधिसूचना, वेळापत्रक व ऑनलाईन आवेदनपत्राबाबतची माहिती महाराष्ट्र राज्य परीक्षा परिषदेच्या http://www.mscepune.in/ या संकेतस्थळावर प्रसिध्द करण्यात आले आहे.
तरी परीक्षार्थी/उमेदवारांनी वेळोवेळी www.mscepune.in या संकेतस्थळावर भेट द्यावी.
केंद्रप्रमुख पदासाठीच्या भरतीचे नियम
या भरतीसाठी काही महत्त्वाचे नियम आणि अटी निश्चित करण्यात आल्या आहेत:
- पदोन्नती: एकूण मंजूर पदांपैकी ५०% पदे पदोन्नतीने भरली जातील. या पदांसाठी पात्र उमेदवार म्हणून जिल्हा परिषदेतील प्राथमिक शाळेतील मुख्याध्यापक आणि प्रशिक्षित पदवीधर शिक्षक (प्राथमिक) यांचा विचार केला जाईल. प्रशिक्षित पदवीधर शिक्षकांसाठी ६ वर्षांची अखंड नियमित सेवा आवश्यक आहे.
- मर्यादित विभागीय स्पर्धा परीक्षा: उर्वरित ५०% पदे मर्यादित विभागीय स्पर्धा परीक्षेमार्फत भरली जातील. यासाठी प्रशिक्षित पदवीधर शिक्षक (प्राथमिक) आणि प्रशिक्षित शिक्षक (प्राथमिक) हे पात्र असतील. या उमेदवारांना त्यांच्या पदावर किमान ६ वर्षे सेवा पूर्ण करणे आवश्यक आहे. शिक्षण सेवक पदावरील सेवा देखील या ६ वर्षांच्या कालावधीसाठी विचारात घेतली जाईल.
- आरक्षण: पदोन्नती आणि स्पर्धा परीक्षा दोन्हीमध्ये सामाजिक आरक्षण लागू नसले तरी, दिव्यांगांसाठी ४% समांतर आरक्षण लागू आहे. हे आरक्षण एकूण मंजूर पदांच्या ५०% पदांवर निश्चित केले जाईल.
परीक्षा आणि पुढील प्रक्रिया
या भरतीसाठी महाराष्ट्र राज्य परीक्षा परिषदेमार्फत परीक्षा घेतली जाईल. सन २०२३ मध्ये ज्या उमेदवारांनी या परीक्षेसाठी अर्ज केला होता, त्यांना पुन्हा नव्याने अर्ज करण्याची आवश्यकता नाही. त्यांना वय आणि पात्रतेसंदर्भात त्यांच्या नोंदी अद्ययावत करण्याची संधी दिली जाईल.
प्रत्येक जिल्हा परिषदेसाठी स्वतंत्र गुणवत्ता यादी आणि निवड यादी जाहीर केली जाईल. उमेदवार ज्या जिल्हा परिषदेच्या सेवेत आहे, त्याच जिल्हा परिषदेसाठी तो अर्ज करू शकेल.
अधिक माहितीसाठी : केंद्रप्रमुख पदासाठीच्या भरतीचे नियम शासन निर्णय पाहा
