राज्यातील प्राथमिक शिक्षण क्षेत्रात कार्यरत असलेल्या आणि टप्पा अनुदासाठी पात्र ठरलेल्या शाळांसाठी एक अत्यंत महत्त्वाची बातमी समोर आली आहे. प्राथमिक शिक्षण संचालनालय, पुणे यांनी नुकतेच एक परिपत्रक जारी केले असून, त्यानुसार राज्यातील अनुदान पात्र शाळांची पडताळणी मोहीम हाती घेण्यात आली आहे. जर आपली शाळा टप्पा अनुदानाच्या यादीत असेल, तर ही माहिती तुमच्यासाठी अत्यंत महत्त्वाची आहे.
शासन निर्णय दिनांक २५/०८/२०२५ अन्वये, ज्या शाळांना २०%, ४०%, ६०% किंवा ८०% टप्पा अनुदान जाहीर झाले आहे, अशा शाळांची आता प्रत्यक्ष तपासणी (Tappa Anudan School Tapasni) केली जाणार आहे. या प्रक्रियेबद्दल सविस्तर माहिती खालीलप्रमाणे आहे.
टप्पा अनुदान पात्र शाळांची तपासणी नेमकं प्रकरण काय आहे?
शालेय शिक्षण विभागाने २५ ऑगस्ट २०२५ रोजी निर्गमित केलेल्या शासन निर्णयानुसार, अनेक प्राथमिक शाळा आणि तुकड्यांना टप्पा अनुदान मंजूर करण्यात आले होते. या शासन निर्णयातील ‘अट क्रमांक १७’ नुसार, दरवर्षी शिक्षण संचालकांनी किमान ५ टक्के शाळांची ‘ईश्वरचिट्ठी’ (Lottery) पद्धतीने निवड करून त्यांची पडताळणी करणे बंधनकारक आहे.
त्यानुसार, शिक्षण संचालक यांनी १३ फेब्रुवारी २०२६ रोजी आदेश काढून, राज्यातील विविध जिल्ह्यांमधील ५ टक्के शाळांच्या तपासणीचे निर्देश दिले आहेत. यात शाळेच्या कागदपत्रांपासून ते भौतिक सुविधांपर्यंत सर्व बाबी तपासल्या जाणार आहेत.
टप्पा अनुदान शाळा तपासणीचे वेळापत्रक
शाळांनी आणि शिक्षकांनी खालील तारखा लक्षात ठेवणे आवश्यक आहे.
- तपासणीचा कालावधी: २० फेब्रुवारी २०२६ ते १८ मार्च २०२६
- अहवाल सादर करण्याची अंतिम मुदत: २५ मार्च २०२६
तपासणी कोण करणार? (Cross District Inspection)
यावेळी ‘टप्पा अनुदान शाळा तपासणी‘ प्रक्रियेत अत्यंत पारदर्शकता ठेवण्यात आली आहे. तुमच्या जिल्हयातील अधिकारी तुमच्या शाळेची तपासणी करणार नाहीत. त्याऐवजी, शेजारच्या किंवा दुसऱ्या जिल्ह्यातील शिक्षणाधिकारी आणि त्यांची टीम तपासणीसाठी येणार आहे.
उदाहरणार्थ:
- रायगड जिल्ह्याची तपासणी ठाणे जिल्हा परिषद पथक करेल.
- सोलापूर जिल्ह्याची तपासणी पुणे जिल्हा परिषद पथक करेल.
- अहिल्यानगर (नगर) जिल्ह्याची तपासणी सोलापूर पथक करेल.
- छत्रपती संभाजीनगर जिल्ह्याची तपासणी जालना पथक करेल.
यामुळे तपासणी प्रक्रियेत कोणताही हस्तक्षेप होणार नाही आणि शासनाला टप्पा अनुदानास पात्र शाळांची तपासणी अचूकपणे करता येईल.
टप्पा अनुदान शाळा तपासणी चेक लिस्ट
तपासणीसाठी आलेल्या पथकाकडे एक विशिष्ट ‘प्रपत्र’ (Form) देण्यात आले आहे. यामध्ये खालील महत्त्वाचे मुद्दे तपासले जातील.
- शाळेचे ठिकाण: शाळा मान्यता मिळालेल्या त्याच ठिकाणी भरत आहे का? की स्थलांतर झाले आहे?
- संचमान्यता व पदसंख्या: २०२४-२५ च्या संचमान्येतेनुसार मंजूर पदे आणि टप्पा अनुदान आदेशातील पदे यात तफावत आहे का?
- शिक्षक व कर्मचारी: ज्या शिक्षकांचे नाव प्रस्तावात आहे, त्यांनाच अनुदान मिळत आहे का? त्यांच्या शालार्थ आयडी आणि वैयक्तिक मान्यतेच्या नोंदी बरोबर आहेत का?
- बायोमेट्रिक हजेरी: शाळेत विद्यार्थी आणि शिक्षकांसाठी ‘बायोमेट्रिक’ किंवा ‘Face Recognition’ हजेरी प्रणाली वापरली जात आहे का?
- सुरक्षा उपाययोजना: दिनांक १३ मे २०२५ च्या शासन निर्णयानुसार शाळेत सीसीटीव्ही (CCTV) आणि इतर सुरक्षा उपाययोजनांची अंमलबजावणी केली आहे का?
Tappa Anudan School Tapasni केवळ कागदोपत्री नसून प्रत्यक्ष शाळेवर भेटी देऊन होणार आहे. त्यामुळे मुख्याध्यापक आणि संस्थाचालकांनी आपली सर्व रेकॉर्ड्स, शिक्षक मान्यता, विद्यार्थी पटसंख्या आणि बायोमेट्रिक हजेरीचे रेकॉर्ड अद्ययावत ठेवणे गरजेचे आहे. विशेषतः शाळेची जागा आणि शिक्षक बदल याबाबतचे शासन आदेश जागेवर उपलब्ध असणे आवश्यक आहे.
अधिक माहितीसाठी: टप्पा अनुदान शाळा तपासणी लेटर डाउनलोड करा
