ज्या विद्यार्थ्यांना नियमित शाळेतून 10वीचे शिक्षण पूर्ण करता आले नाही त्यांच्यासाठी महाराष्ट्र राज्य माध्यमिक व उच्च माध्यमिक शिक्षण मंडळातर्फे SSC Form No 17 ची सुविधा उपलब्ध करून दिली आहे.
SSC Form No 17 संपूर्ण माहिती
SSC Form No 17 विद्यार्थी खासगीरीत्या माध्यमिक शालांत प्रमाणपत्र (इ.10वी) परीक्षेत सहभागी होऊ शकतात. या योजनेमुळे शिक्षण प्रवाहातून बाहेर राहिलेल्या विद्यार्थ्यांना पुन्हा शिक्षणाच्या मुख्य प्रवाहात येण्याची संधी मिळते.
अर्ज करण्यासाठी, उमेदवाराने मान्यताप्राप्त शाळेतून किमान 5 वी उत्तीर्ण असणे आवश्यक आहे. तसेच, 31 जुलै रोजी उमेदवाराचे वय किमान 14 वर्षे पूर्ण झालेले असावे.
या योजनेमुळे विद्यार्थ्यांना नियमित विद्यार्थ्यांप्रमाणेच 10वीच्या परीक्षेला बसता येते.
SSC Form No 17 भरताना विद्यार्थ्याने ऑनलाइन पद्धतीनेच अर्ज करावा. अर्ज ऑफलाइन स्वीकारला जाणार नाही. अर्ज भरण्यापूर्वी विद्यार्थ्यांनी ज्या शाळेतून परीक्षा द्यायची आहे, त्या शाळेचा सांकेतांक, विषय आणि माध्यम यांची माहिती घेणे आवश्यक आहे.
SSC 17 No Form 2026 अर्ज भरण्याची प्रक्रिया आणि आवश्यक कागदपत्रे
SSC Form No 17 भरण्यासाठी ऑनलाइन प्रक्रिया अनिवार्य आहे. अर्ज मंडळाच्या अधिकृत संकेतस्थळावरून (https://mahahsscboard.in/) ‘Student Corner’ या पर्यायाचा वापर करून भरला जातो.
अर्ज करताना विद्यार्थ्यांना काही आवश्यक कागदपत्रे स्कॅन करून अपलोड करावी लागतील. यामध्ये शाळा सोडल्याचा दाखला (मूळ प्रत), मूळ प्रत नसल्यास द्वितीय प्रत आणि प्रतिज्ञापत्र (प्रपत्र अ किंवा ब), आधार कार्ड, फोटो आणि परराज्यातील विद्यार्थ्यांसाठी महाराष्ट्रातील रहिवासाचा दाखला यांचा समावेश आहे.
अर्ज भरताना, विद्यार्थ्यांना त्यांच्या सध्याच्या पत्त्यानुसार जिल्हा, तालुका आणि माध्यमावर आधारित माध्यमिक शाळांची यादी दिसेल. यातून त्यांना एका शाळेची निवड करावी लागते.
अर्ज पूर्ण झाल्यानंतर, नावनोंदणी शुल्क ऑनलाइन पद्धतीने भरणे अनिवार्य आहे. भरलेल्या अर्जाची प्रिंटआउट, शुल्क भरल्याची पावती आणि हमीपत्र यासह दोन प्रती काढून त्या निवडलेल्या शाळेत विहित मुदतीत जमा कराव्या लागतात. शाळेने प्राप्त झालेल्या अर्जातील माहिती आणि कागदपत्रे तपासावीत आणि ती विभागीय मंडळाकडे ऑनलाइन पाठवावीत.
अर्ज शुल्क आणि इतर महत्त्वाच्या सूचना
SSC Form No 17 साठी नावनोंदणी शुल्क रु. 1110/- आहे आणि प्रक्रिया शुल्क (processing fee) रु. 100/- आहे. विलंब शुल्क रु. 100/- आणि अतिविलंब शुल्क प्रति विद्यार्थी प्रति दिन रु. 20/- आहे.
एकदा नावनोंदणी प्रमाणपत्र (Enrollment Certificate) मिळाल्यानंतर, जरी विद्यार्थी परीक्षेत सहभागी झाला नाही तरी शुल्क परत केले जाणार नाही. मात्र, परीक्षेचे शुल्क भरले असल्यास, नियमांनुसार काही रक्कम परत मिळू शकते.
खाजगी विद्यार्थ्यांना तांत्रिक किंवा व्यावसायिक गटातील विषय निवडता येणार नाहीत. विद्यार्थ्यांनी ज्या शाळेतून नावनोंदणी केली आहे, त्याच शाळेच्या परीक्षा केंद्रावर परीक्षा देणे बंधनकारक आहे. तसेच, एकदा 10वीची परीक्षा उत्तीर्ण किंवा अनुत्तीर्ण झाल्यानंतर पुन्हा अर्ज क्रमांक 17 भरता येत नाही. त्यामुळे विद्यार्थ्यांनी अर्ज काळजीपूर्वक भरावा.
