SWA Janganana Link: केंद्र सरकारच्या ‘डिजिटल इंडिया‘ मोहिमेला बळकटी देण्यासाठी आगामी जनगणना २०२७ ही पूर्णपणे डिजिटल स्वरूपात पार पडणार आहे. भारतीय जनगणनेच्या इतिहासात पहिल्यांदाच नागरिकांना आपली माहिती स्वतःहून ऑनलाइन भरण्याची सुविधा म्हणजेच ‘स्व-गणना’ (Self-Enumeration) उपलब्ध करून देण्यात आली आहे. यामुळे माहिती संकलनाची अचूकता वाढणार असून वेळेचीही मोठी बचत होणार आहे.
महाराष्ट्र राज्यासाठी या स्व-गणनेचा कालावधी १ मे २०२६ ते १५ मे २०२६ असा निश्चित करण्यात आला आहे. घर-यादी आणि गृहगणनेच्या मुख्य टप्प्यापूर्वी नागरिकांना ही १५ दिवसांची विशेष संधी देण्यात आली आहे.
स्व-गणना कशी करावी? | SWA Janganana Link
महाराष्ट्राच्या मुख्य प्रधान जनगणना अधिकारी डॉ. निरुपमा जे. डांगे यांनी दिलेल्या माहितीनुसार, नागरिकांच्या सोयीसाठी एक सुरक्षित वेब पोर्टल विकसित करण्यात आले आहे.
१. अधिकृत पोर्टलला भेट द्या: स्व-गणना करण्यासाठी नागरिकांनी https://se.census.gov.in या अधिकृत संकेतस्थळाला भेट द्यायची आहे.
२. नोंदणी आणि माहिती: कुटुंबातील कोणताही एक जबाबदार सदस्य अंदाजे १५ ते २० मिनिटांत आपल्या संपूर्ण कुटुंबाचा तपशील या पोर्टलवर भरू शकतो.
३. दस्तावेजांची गरज नाही: विशेष म्हणजे ही प्रक्रिया पूर्ण करताना कोणतेही कागदपत्र किंवा दस्तऐवज अपलोड करण्याची आवश्यकता नाही.
४. ओळखपत्र (SEID): माहिती यशस्वीरित्या सादर केल्यानंतर, पोर्टलद्वारे एक ‘स्व-गणना ओळखपत्र’ (Self-Enumeration ID – SEID) तयार होईल. हा आयडी तुमच्या नोंदणीकृत मोबाईल नंबर किंवा ई-मेलवर पाठवला जाईल.
प्रगणकांकडे ‘एसई आयडी’ देणे आवश्यक
स्व-गणना करणे हे पूर्णपणे ऐच्छिक आहे. ज्या नागरिकांनी १५ मे पर्यंत स्वतःहून माहिती भरली आहे, त्यांच्या घरी १६ मे ते १४ जून २०२६ या कालावधीत प्रगणक (Enumerators) भेट देतील. त्यावेळी नागरिकांनी त्यांना प्राप्त झालेला ‘एसई आयडी’ प्रगणकांसोबत शेअर करणे आवश्यक आहे. प्रगणकाने या डेटाची पडताळणी आणि मान्यता दिल्यानंतरच तुमच्या कुटुंबाची गणना पूर्ण मानली जाईल.
ज्या नागरिकांना ऑनलाइन माहिती भरणे शक्य होणार नाही, त्यांनी काळजी करण्याची गरज नाही. अशा कुटुंबांची माहिती नोंदवण्यासाठी प्रगणक स्वतः घरी येऊन डिजिटल पद्धतीने माहिती संकलित करतील.
सुरक्षा आणि खबरदारी
डिजिटल पद्धतीचा अवलंब करताना सायबर सुरक्षेची विशेष काळजी घेण्यात आली आहे. नागरिकांनी भरलेली सर्व माहिती एनक्रिप्टेड स्वरूपात सरकारी सर्व्हरमध्ये सुरक्षित ठेवली जाते. तरीही, नागरिकांनी फसवणूक टाळण्यासाठी खालील गोष्टींची खात्री करावी.
- केवळ https://se.census.gov.in याच अधिकृत यूआरएलचा वापर करा.
- जनगणनेशी संबंधित अधिकृत एसएमएसमध्ये प्रेषकाच्या नावात ‘RGICEN’ हा कीवर्ड (उदा. AD-RGICEN-S, RGICEN-G) असणे अनिवार्य आहे.
- ओटीपी किंवा संदेशाची सत्यता पडताळूनच पुढील प्रक्रिया करा.
डिजिटल इंडियाच्या या उपक्रमात सहभागी होऊन आपली आणि आपल्या कुटुंबाची माहिती अचूकपणे नोंदवून देशाच्या विकास प्रक्रियेत योगदान देण्याचे आवाहन प्रशासनातर्फे करण्यात आले आहे.
