राज्यातील दिव्यांग बांधवांसाठी असणाऱ्या विशेष सहाय्य योजनेंतर्गत संजय गांधी निराधार अनुदान योजना किंवा श्रावणबाळ यांसारख्या योजनांचा लाभ घेणाऱ्या ज्या दिव्यांग व्यक्तीकडे वैश्विक ओळखपत्र (UDID Card) नाही, त्यांच्यासाठी आता शासनाने ३० सप्टेंबर २०२६ पर्यंत मुदतवाढ (UDID Card Deadline Extended) जाहीर केली आहे.
दिव्यांग सक्षमीकरण विभागाने १५ मे २०२६ रोजी यासंदर्भातील नवीन शासन निर्णय अधिकृतपणे जारी केला आहे. या नव्या निर्णयामुळे ज्यांचे अनुदान थांबले होते किंवा ज्यांना लाभापासून वंचित राहण्याची भीती होती, त्यांच्यासाठी हा एक मोठा आधार ठरला आहे.
यापूर्वी शासनाच्या सामाजिक न्याय व विशेष सहाय्य विभागाने अनुदानाचा लाभ घेण्यासाठी सर्व दिव्यांगांसाठी वैश्विक ओळखपत्र असणे सक्तीचे केले होते.
ओळखपत्र बंधनकारक केल्यामुळे ज्यांच्याकडे हे कार्ड नव्हते अशा अनेक दिव्यांग लाभार्थ्यांना योजनेचे लाभ मिळणे थेट बंद झाले होते, ज्यामुळे दिव्यांगांमध्ये साहजिकच मोठ्या प्रमाणावर असंतोष आणि चिंता निर्माण झाली होती.
परंतु आता शासनाने या परिस्थितीची गंभीर दखल घेतली आहे. १ एप्रिल २०२६ पूर्वी जुन्या वैद्यकीय प्रमाणपत्रावर किंवा SADM प्रमाणपत्रावर विशेष सहाय्य योजनेतून लाभ घेत असलेल्या दिव्यांगांना आता ३० सप्टेंबर २०२६ पर्यंत मुदतवाढ (UDID Card Deadline Extended) देण्यात आली आहे.
यातील सर्वात महत्त्वाची आणि समाधानाची बाब म्हणजे, या वाढीव कालावधीत कोणाचेही अनुदान थांबवले जाणार नसून त्यांचे लाभ पूर्वीप्रमाणेच सुरू ठेवण्याचे स्पष्ट निर्देश देण्यात आले आहेत.
15 जून 2026 पूर्वी स्वावलंबन पोर्टलवर UDID Card साठी अर्ज करणे आवश्यक
शासनाने अनुदानाचा लाभ सुरू ठेवला असला तरी, लाभार्थ्यांना UDID Card ओळखपत्र काढण्याच्या प्रक्रियेकडे दुर्लक्ष करून चालणार नाही. वैश्विक ओळखपत्र नसलेल्या सर्व दिव्यांग लाभार्थ्यांनी १५ जून २०२६ पूर्वी स्वावलंबन पोर्टलवर नवीन युडीआयडी कार्ड प्राप्त करण्यासाठी आपला अर्ज सादर करणे अत्यंत आवश्यक आहे.
हे ही वाचा: UDID Card (स्वावलंबन कार्ड) ऑनलाईन कसे काढायचे? स्टेप-बाय-स्टेप संपूर्ण माहिती
तुम्ही अर्ज केल्यानंतर तुम्हाला मिळणारा अर्जाचा क्रमांक (Enrollment Number) संबंधित तहसीलदारांमार्फत विशेष सहाय्य योजनेच्या ‘सॅस’ (SAS) पोर्टलवर अद्ययावत करून घेतला जाईल. या प्रक्रियेमुळे भविष्यात कोणत्याही तांत्रिक अडचणीविना अनुदानाचा लाभ थेट तुमच्या बँक खात्यात जमा होण्यास मदत होईल.
अनेक दिव्यांग बांधवांच्या आधार कार्ड आणि युडीआयडी कार्डवरील जन्म तारखेत तफावत असल्याच्या अनेक तक्रारी समोर आल्या होत्या. या समस्येवर कायमचा तोडगा काढण्यासाठी तहसीलदार आणि संबंधित जिल्हा प्रशासनामार्फत विशेष मोहीम राबवून या सर्व चुका आणि तफावत दूर केली जाणार आहे.
एवढेच नाही तर, प्रत्येक महिन्याच्या तिसऱ्या गुरुवारी विशेष शिबिरे आयोजित करून दिव्यांगांना मार्गदर्शन केले जाणार आहे. या सर्व पडताळणी प्रक्रियेत गावपातळीवर वाचन करून ज्यांची नावे बोगस आहेत किंवा जे लाभार्थी आता हयात नाहीत, त्यांना या योजनेतून कायमचे वगळण्याचे आणि त्यांनी घेतलेल्या रकमेची वसुली करण्याचे कडक निर्देशही शासनाने दिले आहेत.
त्यामुळे खऱ्या आणि गरजू दिव्यांगांपर्यंतच योजनेचा लाभ पोहोचेल याची खात्री होईल. ३० सप्टेंबर २०२६ पूर्वी प्रत्येक पात्र दिव्यांगाला हे ओळखपत्र मिळवून देण्याची संपूर्ण जबाबदारी आता प्रशासनाची असणार आहे.
अधिक माहितीसाठी : वैश्विक ओळखपत्र (UDID) काढण्यासाठी शासनाकडून मुदतवाढ देण्याचा शासन निर्णय डाउनलोड करा
