11th Admission New GR महाराष्ट्र शासनाच्या शालेय शिक्षण व क्रीडा विभागाने शैक्षणिक वर्ष २०२५-२६ पासून ११ वी केंद्रीय ऑनलाईन प्रवेश प्रक्रियेसंदर्भात सुधारित सूचना जारी केल्या आहेत. या सुधारणा प्रामुख्याने अल्पसंख्याक आणि इन-हाऊस कोट्यातील जागांच्या व्यवस्थापनाशी संबंधित आहेत.
11th Admission New GR सुधारित सूचना
अल्पसंख्याक कोट्यातील बदल: मागील शासन निर्णयानुसार, अल्पसंख्याक उच्च माध्यमिक विद्यालये/कनिष्ठ महाविद्यालयांना ५०% अल्पसंख्याक कोटा होता. या कोट्यातील जागा व्यवस्थापनाला सर्वसाधारण नियमित ३ फेऱ्या संपेपर्यंत गुणवत्तेनुसार भरण्याची मुभा होती आणि या जागा कोणत्याही परिस्थितीत प्रत्यार्पित (surrender) करता येत नव्हत्या. तसेच, ३ फेऱ्या संपल्यानंतरही जागा रिक्त राहिल्यास त्या चौथ्या नियमित फेरीपूर्वी प्रत्यार्पित करता येत होत्या. आता या नियमांमध्ये बदल करण्यात आला आहे.
11th Admission New GR नवीन सूचनेनुसार, अल्पसंख्याक कोट्यातील जागा पहिल्या फेरीअंती रिक्त राहिल्यास, पहिल्या फेरीनंतर अल्पसंख्याक दर्जा प्राप्त कनिष्ठ महाविद्यालयांना उर्वरित जागा प्रत्यार्पित करण्याची मुभा असेल. तथापि, दुसऱ्या फेरीच्या वेळी अल्पसंख्याक कोट्यातून प्रवेशासाठी अर्ज प्राप्त झाल्यास, त्या विद्यार्थ्यांना प्रथम प्रवेश अल्पसंख्याक कोट्यातून देण्यात येईल. त्यानंतरही रिक्त असलेल्या अल्पसंख्याक कोट्यातील जागा सर्वसाधारण कोट्यात प्रत्यार्पित करण्याची मुभा महाविद्यालयांना असेल. महत्त्वाचे म्हणजे, उर्वरित जागा प्रत्यार्पित करणे हे पूर्णतः ऐच्छिक असून कोणत्याही अल्पसंख्याक संस्थेवर बंधनकारक नसेल.
इन-हाऊस कोट्यातील बदल: खाजगी व्यवस्थापनाच्या उच्च माध्यमिक शाळा/कनिष्ठ महाविद्यालयांमध्ये इन-हाऊस कोट्याअंतर्गत १०% जागा आरक्षित असतील. या जागा गुणवत्तेनुसार ऑनलाईन पद्धतीने भराव्या लागतील. उच्च माध्यमिक शाळा असलेल्या परिसरात/आवारात माध्यमिक शाळा असल्यास, त्या माध्यमिक शाळेतील उमेदवारांना हा कोटा लागू असेल. बिगर अल्पसंख्याक आणि अल्पसंख्याक दोन्ही शाळांना इन-हाऊस कोटा लागू असेल. सर्वसाधारण नियमित दुसरी फेरी संपेपर्यंत या कोट्यातील जागा भरता येतील आणि त्यानंतर रिक्त असल्यास त्या प्रत्यार्पित करणे व्यवस्थापनास अनिवार्य असेल.
शासकीय व स्थानिक स्वराज्य संस्थांच्या उच्च माध्यमिक शाळा व कनिष्ठ महाविद्यालयांमध्ये इन-हाऊस कोटा ५०% असेल. या कोट्यासाठी १० वीची परीक्षा राज्यातील शासकीय/स्थानिक स्वराज्य संस्थांच्या शाळांमधून उत्तीर्ण होणारे विद्यार्थी पात्र असतील.
नवीन सूचनेनुसार, मुंबई शहर, मुंबई उपनगर व ठाणे येथे उच्च माध्यमिक शाळा/कनिष्ठ महाविद्यालय/वरिष्ठ महाविद्यालय संलग्नित संस्थांच्या शाळांसाठी एक युनिट ग्राह्य धरले जाईल. राज्यातील उर्वरित जिल्ह्यांसाठी, त्याच संस्थेची शाळा व उच्च माध्यमिक शाळा/कनिष्ठ महाविद्यालय/वरिष्ठ महाविद्यालय यासाठी महसुली जिल्ह्यामध्ये एक युनिट इन-हाऊस कोट्यासाठी ग्राह्य धरले जाईल.
अधिक माहितीसाठी: शासन शुद्धीपत्रक येथे डाउनलोड करा
इन-हाऊस कोटा म्हणजे काय? | Inhouse Quota Admission Meaning
इन-हाऊस कोटा यास “संस्थांतर्गत कोटा” असेही म्हणतात. याचा अर्थ असा आहे की, एखाद्या शिक्षण संस्थेच्या कनिष्ठ महाविद्यालयात (Junior College) अकरावीच्या प्रवेशासाठी त्या संस्थेच्याच माध्यमिक शाळेतून (Secondary School) दहावी उत्तीर्ण झालेल्या विद्यार्थ्यांसाठी काही जागा राखीव ठेवल्या जातात.
सोप्या भाषेत सांगायचे झाल्यास, जर तुम्ही एखाद्या विशिष्ट संस्थेच्या शाळेतून दहावी पास झाला असाल आणि तुम्हाला त्याच संस्थेच्या ज्युनिअर कॉलेजमध्ये अकरावीला प्रवेश घ्यायचा असेल, तर तुम्हाला ‘इन-हाऊस कोट्या’अंतर्गत काही विशिष्ट जागांवर प्राधान्य मिळू शकते. या कोट्यात साधारणतः एकूण जागांपैकी 10% जागा राखीव असतात.
अकरावी ऑनलाइन प्रवेश अधिकृत वेबसाईट : https://mahafyjcadmissions.in/
