MHT CET PCM Result 26 विद्यार्थ्यांनी मिळवले 100 पर्सेंटाईल, जाणून घ्या संपूर्ण निकालाचे तपशील

महाराष्ट्र राज्य सामायिक प्रवेश परीक्षा कक्षाने (CET Cell) १५ जून २०२६ रोजी MHT-CET 2026 (PCM Group First Attempt) या परीक्षेचा निकाल जाहीर केला आहे. यामध्ये २६ विद्यार्थ्यांनी १०० Percentile मिळवले आहे. या निकालाचे सविस्तर Result Summary पाहूया.

महाराष्ट्र राज्य सामाईक प्रवेश परीक्षा कक्षाने (State CET Cell) MHT CET 2026 च्या PCM (Physics, Chemistry आणि Mathematics) गटाच्या पहिल्या प्रयत्नाचा निकाल अधिकृतपणे जाहीर केला आहे. अभियांत्रिकी, तंत्रज्ञान आणि संबंधित पदवी अभ्यासक्रमांमध्ये प्रवेश घेऊ इच्छिणाऱ्या लाखो विद्यार्थ्यांसाठी हा निकाल अत्यंत महत्त्वाचा मानला जातो.

यंदा राज्यभरातून मोठ्या संख्येने विद्यार्थ्यांनी परीक्षेला हजेरी लावली असून, त्यापैकी तब्बल 26 विद्यार्थ्यांनी 100 पर्सेंटाईल मिळवत उल्लेखनीय कामगिरी केली आहे. या निकालामुळे गुणवंत विद्यार्थ्यांमध्ये आनंदाचे वातावरण असून आता सर्वांचे लक्ष केंद्रीय प्रवेश प्रक्रिया (CAP) कडे लागले आहे.

MHT CET 2026 च्या PCM गटाची परीक्षा 11 एप्रिल ते 20 एप्रिल 2026 या कालावधीत एकूण 16 सत्रांमध्ये घेण्यात आली होती. महाराष्ट्रातील सर्व जिल्ह्यांमध्ये परीक्षा केंद्रांची व्यवस्था करण्यात आली होती.

अधिकृत आकडेवारीनुसार या परीक्षेसाठी एकूण 4 लाख 79 हजार 332 विद्यार्थ्यांनी नोंदणी केली होती. त्यापैकी 4 लाख 54 हजार 69 विद्यार्थी प्रत्यक्ष परीक्षेला उपस्थित राहिले. त्यामुळे यंदा परीक्षेची एकूण उपस्थिती 94.73 टक्के इतकी नोंदविण्यात आली. मुलांची उपस्थिती 94.28 टक्के तर मुलींची उपस्थिती 95.42 टक्के राहिली. यावरून यंदा विद्यार्थ्यांचा प्रतिसाद मोठ्या प्रमाणात मिळाल्याचे स्पष्ट होते.

यंदाच्या निकालातील सर्वात मोठे वैशिष्ट्य म्हणजे 26 विद्यार्थ्यांनी 100 पर्सेंटाईल मिळवत सर्वोच्च यश संपादन केले आहे. या गुणवंत विद्यार्थ्यांमध्ये पुणे, नागपूर, ठाणे, मुंबई, गोंदिया, चंद्रपूर, धाराशिव, लातूर, सोलापूर, यवतमाळ यांसारख्या महाराष्ट्रातील विविध जिल्ह्यांतील विद्यार्थ्यांचा समावेश आहे. विशेष म्हणजे महाराष्ट्राबाहेरील जबलपूर आणि कोलकाता येथील विद्यार्थ्यांनीही 100 पर्सेंटाईल मिळवले आहेत.

सीईटी सेल (All Courses) विद्यार्थी सहाय्यता केंद्रांची यादी प्रसिद्ध, डाउनलोड डायरेक्ट लिंक

100 पर्सेंटाईल मिळवणाऱ्या विद्यार्थ्यांमध्ये पुण्याचा आर्यन शैलेन्द्र कुंजीर, मुंबई उपनगरचा आदर्श राज, नागपूरचा आर्यन अजित शर्मा, चंद्रपूरचा चैतन्य गणेश येरणे, अहिल्यानगरची ईश्वरी सुरेश गागरे, पुण्याचा इबादूर रहमान कमरुल बारलासकर, धाराशिवचा अनंत अशोक जाधव, गोंदियाची जान्हवी असाती, चंद्रपूरची जान्हवी मिश्रा, सोलापूरचा सार्थक खानापुरे, लातूरचा ध्रुव खोसे, नागपूरचा ऐश्वर्य लाडे, पुण्याचा नामीश कौशिक, यवतमाळचा राजदीप ठाकरे, मुंबईचा रेयान कुमार, गोंदियाचा रुतुराज राजे, नागपूरचा शौर्य फुलबांधे तसेच ठाण्यातील शौर्य पंकज सिंह आणि वेद तळेले यांच्यासह इतर विद्यार्थ्यांनीही उत्कृष्ट यश मिळवले आहे.

निकालासोबत CET Cell ने प्रवर्गनिहाय अव्वल विद्यार्थ्यांची यादीही जाहीर केली आहे. खुल्या प्रवर्गात अनेक विद्यार्थ्यांनी 100 पर्सेंटाईल मिळवले असून OBC प्रवर्गात आर्यन अजित शर्मा, चैतन्य गणेश येरणे, ईश्वरी गागरे, राजदीप ठाकरे आणि शौर्य फुलबांधे यांनी 100 पर्सेंटाईल मिळवले आहेत. SC प्रवर्गात नागपूरचा ऐश्वर्य अतुल लाडे आणि ST प्रवर्गात धाराशिवचा अनंत अशोक जाधव यांनीही 100 पर्सेंटाईल मिळवत आपली गुणवत्ता सिद्ध केली आहे. SEBC, NT-B, NT-C, NT-D, SBC आणि OMS या प्रवर्गांतील अव्वल विद्यार्थ्यांची नावे देखील अधिकृत निकालात प्रसिद्ध करण्यात आली आहेत.

निकाल जाहीर झाल्यानंतर आता विद्यार्थ्यांसाठी पुढील महत्त्वाचा टप्पा म्हणजे CAP (Centralized Admission Process) अभियांत्रिकी, फार्मसी आणि इतर व्यावसायिक अभ्यासक्रमांच्या प्रवेशासाठी लवकरच ऑनलाइन नोंदणी प्रक्रिया सुरू होणार आहे. त्यामुळे विद्यार्थ्यांनी आपला CET स्कोअर, आवश्यक कागदपत्रे, जातीचा दाखला, उत्पन्न प्रमाणपत्र, EWS प्रमाणपत्र, नॉन-क्रीमी लेयर, डोमिसाईल आणि इतर आवश्यक कागदपत्रे तयार ठेवावीत. प्रवेश प्रक्रियेचे वेळापत्रक CET Cell कडून स्वतंत्रपणे जाहीर केले जाणार आहे.

MHT CET 2026 PCM गटाचा निकाल हा यंदाच्या शैक्षणिक वर्षातील सर्वात महत्त्वाच्या निकालांपैकी एक मानला जात आहे. 94.73 टक्के इतकी मोठी उपस्थिती, 26 विद्यार्थ्यांचे 100 पर्सेंटाईल आणि राज्यभरातील विद्यार्थ्यांची उत्कृष्ट कामगिरी यामुळे यंदाचा निकाल विशेष ठरला आहे. आता विद्यार्थ्यांनी प्रवेश प्रक्रियेच्या प्रत्येक टप्प्यावर लक्ष ठेवून वेळेत अर्ज करणे आणि पसंतीच्या अभियांत्रिकी महाविद्यालयात प्रवेश मिळवण्यासाठी आवश्यक तयारी सुरू ठेवणे गरजेचे आहे.