राज्यातील विद्यार्थ्यांच्या सुरक्षिततेला अधिक बळकटी देण्यासाठी शिक्षण विभागाने महत्त्वाचे पाऊल उचलले आहे. महाराष्ट्रातील सर्व शासकीय, अनुदानित आणि विनाअनुदानित शाळांचे Safety Audit (सुरक्षा मूल्यांकन) तातडीने पूर्ण करण्याचे निर्देश शिक्षण संचालनालयाने दिले आहेत. प्रत्येक शाळेने Manual of Safety & Security in School मधील मार्गदर्शक सूचनांनुसार सुरक्षा तपासणी करून त्याचा अहवाल सादर करावा, असे आदेश संबंधित शिक्षणाधिकाऱ्यांना देण्यात आले आहेत.
शिक्षण विभागाने जारी केलेल्या पत्रानुसार, राजस्थानातील झालावाड येथे घडलेल्या दुर्दैवी घटनेनंतर राष्ट्रीय मानवाधिकार आयोगाने देशातील सर्व राज्यांना शाळांमधील सुरक्षा व्यवस्थेचा आढावा घेण्याच्या सूचना दिल्या होत्या. त्यानुसार महाराष्ट्र शासनानेही राज्यातील प्रत्येक शाळेचे सुरक्षा मूल्यांकन करण्याची प्रक्रिया तातडीने सुरू करण्याचा निर्णय घेतला आहे.
या मोहिमेत केवळ सरकारी शाळाच नव्हे, तर खासगी अनुदानित आणि विनाअनुदानित शाळांचाही समावेश असणार आहे. शाळेची इमारत सुरक्षित आहे का, अग्निसुरक्षेची व्यवस्था पुरेशी आहे का, आपत्कालीन परिस्थितीत विद्यार्थ्यांना बाहेर काढण्यासाठी आवश्यक सुविधा उपलब्ध आहेत का, तसेच इतर सुरक्षाविषयक नियमांचे पालन होत आहे का, याची सविस्तर तपासणी केली जाणार आहे.
ही प्रक्रिया प्रभावीपणे राबविण्यासाठी जिल्हाधिकारी, मुख्य कार्यकारी अधिकारी, महानगरपालिका, नगरपालिका आणि शिक्षण विभागातील संबंधित यंत्रणांनी परस्पर समन्वय साधून काम करण्याच्या सूचना देण्यात आल्या आहेत. जिल्हास्तरावर या संपूर्ण मोहिमेवर देखरेख ठेवण्याची जबाबदारीही निश्चित करण्यात आली आहे.
Safety Audit पूर्ण झाल्यानंतर प्रत्येक शाळेचा अहवाल शाळानिहाय, तालुकानिहाय आणि व्यवस्थापननिहाय तयार करून विभागीय शिक्षण उपसंचालक कार्यालयाकडे पाठवावा लागणार आहे. त्यानंतर जिल्हानिहाय एकत्रित अहवाल शिक्षण संचालनालयाकडे सादर केला जाणार आहे. या कामात कोणताही विलंब होऊ नये, यासाठी संबंधित अधिकाऱ्यांनी स्वतः लक्ष घालून कार्यवाही करण्याचे निर्देशही पत्रात देण्यात आले आहेत.
राज्यातील लाखो विद्यार्थ्यांच्या सुरक्षिततेच्या दृष्टीने हा निर्णय महत्त्वाचा मानला जात आहे. Safety Audit दरम्यान आढळणाऱ्या त्रुटी दूर करून शाळांमध्ये अधिक सुरक्षित वातावरण निर्माण करण्यावर शिक्षण विभागाचा भर असणार आहे.
अधिक महितीसाठी: Safety Audit परिपत्रक डाउनलोड करा
