राज्यातील दिव्यांग संवर्गातील शिक्षक उमेदवारांना शिक्षक पात्रता परीक्षा (TET) मध्ये 15 टक्के गुणांची सवलत देण्याची मागणी पुढे आली आहे. यासंदर्भात दिव्यांग सक्षमीकरण आयुक्तालय, महाराष्ट्र राज्य, पुणे यांनी शिक्षण आयुक्त, महाराष्ट्र राज्य यांना पत्र पाठवून आवश्यक कार्यवाही करण्याची विनंती केली आहे.
दिव्यांग सक्षमीकरण आयुक्तालयाने 1 जुलै 2026 रोजी जारी केलेल्या पत्रात महाराष्ट्र राज्य दिव्यांग (अपंग) कर्मचारी संघटनेने केलेल्या मागणीचा संदर्भ देण्यात आला आहे. 20 एप्रिल 2026 रोजी सादर केलेल्या निवेदनात दिव्यांग संवर्गातील शिक्षक उमेदवारांना TET परीक्षेत 15 टक्के गुणांची सवलत देण्याची मागणी केली होती.
पत्रात नमूद करण्यात आले आहे की, दिव्यांग व्यक्ती हक्क अधिनियम, 2016 नुसार दिव्यांगांचे 21 प्रकार निश्चित करण्यात आले आहेत. या विविध दिव्यांग प्रवर्गातील अनेक उमेदवारांना त्यांच्या दिव्यांगत्वामुळे सर्वसामान्य उमेदवारांप्रमाणे गुण मिळविणे शक्य होत नाही. त्यामुळे अशा उमेदवारांना TET परीक्षेत 15 टक्के गुणांची सवलत देणे आवश्यक असल्याचे मत व्यक्त करण्यात आले आहे.
आयुक्तालयाने आपल्या पत्रात सध्याच्या नियमांचाही उल्लेख केला आहे. राज्यातील स्थानिक स्वराज्य संस्था तसेच खाजगी शैक्षणिक संस्थांमधील प्राथमिक, माध्यमिक व उच्च माध्यमिक शाळांमध्ये शिक्षक भरतीसाठी घेतल्या जाणाऱ्या शिक्षक पात्रता परीक्षा (TET) मध्ये आरक्षणानुसार माजी सैनिक, शहीद सैनिकांच्या पत्नी व कुटुंबीयांना 15 टक्के गुणांची सवलत देण्यास शासनाने मान्यता दिली आहे. त्यामुळे या प्रवर्गातील उमेदवारांना उत्तीर्ण होण्यासाठी 45 टक्के गुण आवश्यक असतात.
याच धर्तीवर दिव्यांग उमेदवारांनाही समान सवलत देण्याची मागणी करण्यात आली असून, या संदर्भात योग्य ती कार्यवाही करण्याची विनंती शिक्षण आयुक्तांना करण्यात आली आहे.
मात्र, दिव्यांग उमेदवारांना TET परीक्षेत 15 टक्के गुणांची सवलत देण्याबाबत अद्याप शासनाकडून कोणताही अंतिम शासन निर्णय किंवा अधिकृत आदेश जारी करण्यात आलेला नाही. त्यामुळे सध्या हे केवळ दिव्यांग सक्षमीकरण आयुक्तालयाने शिक्षण आयुक्तांना पाठविलेले शिफारस स्वरूपाचे पत्र असून, अंतिम निर्णय शासनाच्या स्तरावर होणे बाकी आहे.
