MAHA TET Exam 2026 Update: महाराष्ट्र शिक्षक पात्रता परीक्षा (MAHATET) 2026 संदर्भात राज्य परीक्षा परिषदेकडून महत्त्वाचे पाऊल उचलण्यात आले आहे. परीक्षा सुरक्षित, पारदर्शक आणि तांत्रिकदृष्ट्या सक्षम पद्धतीने घेण्यासाठी महाराष्ट्र राज्य परीक्षा परिषद, पुणे यांनी IBPS कडे परीक्षा ऑनलाइन (Computer Based Test – CBT) पद्धतीने आयोजित करण्याची विनंती केली आहे.
6 लाखांहून अधिक उमेदवारांनी भरले होते अर्ज
महाराष्ट्र शिक्षक पात्रता परीक्षा (MAHATET) 2026 साठी राज्यभरातून एकूण 6,00,125 उमेदवारांनी अर्ज केले होते.
पेपर 1 साठी 2,58,061 उमेदवारांनी अर्ज केला होता, तर पेपर 2 साठी 3,42,064 उमेदवारांनी अर्ज भरला होता. या परीक्षेसाठी राज्यातील विविध जिल्ह्यांमध्ये एकूण 1,729 परीक्षा केंद्रे निश्चित करण्यात आली होती.
परीक्षा पुढे ढकलण्यात आली होती
मूळ नियोजनानुसार MAHATET 2026 परीक्षा 28 जून 2026 रोजी घेण्यात येणार होती. मात्र, 27 जून 2026 रोजी प्रसिद्ध करण्यात आलेल्या अधिकृत जाहिर प्रकटनाद्वारे ही परीक्षा पुढे ढकलण्यात आली.
IBPS मार्फत ऑनलाइन परीक्षा घेण्याची विनंती
महाराष्ट्र राज्य परीक्षा परिषदेने IBPS ला पाठविलेल्या पत्रात MAHATET 2026 परीक्षा शक्य तितक्या लवकर ऑनलाइन (CBT) पद्धतीने आयोजित करण्याची विनंती केली आहे. तसेच भविष्यातील शिक्षक पात्रता परीक्षा देखील ऑनलाइन प्रणालीद्वारे घेण्याचा शासनाचा मानस असल्याचे पत्रात नमूद करण्यात आले आहे.
सर्वोच्च न्यायालयाच्या निर्णयामुळे वाढले महत्त्व
पत्रानुसार, 1 सप्टेंबर 2025 रोजी सर्वोच्च न्यायालयाने दिलेल्या निर्णयानुसार सेवेत कार्यरत शिक्षकांनाही TET परीक्षा उत्तीर्ण होणे अनिवार्य करण्यात आले आहे. यासाठी संबंधित शिक्षकांना 2028 पर्यंत मुदत देण्यात आली आहे.
या निर्णयामुळे भविष्यात TET परीक्षेसाठी उमेदवारांची संख्या आणखी वाढण्याची शक्यता असल्याने वर्षातून किमान दोन वेळा MAHATET परीक्षा आयोजित करण्याचा प्रस्ताव असल्याचेही पत्रात नमूद करण्यात आले आहे.
पत्रासोबत कोणती माहिती पाठविण्यात आली?
IBPS कडे पाठविण्यात आलेल्या प्रस्तावासोबत पुढील माहिती जोडण्यात आली आहे.
राज्यानुसार आणि माध्यमनिहाय परीक्षार्थींची संख्या, जिल्हानिहाय परीक्षा केंद्रांची माहिती, सेवेत कार्यरत शिक्षकांची संख्या, दिव्यांग उमेदवारांची माहिती तसेच MAHATET संदर्भातील शासन निर्णय.
उमेदवारांनी काय लक्षात ठेवावे?
सध्या हे पत्र केवळ IBPS मार्फत परीक्षा आयोजित करण्यासाठी पाठविण्यात आलेला प्रस्ताव आहे. या पत्रामध्ये नवीन परीक्षा दिनांक, प्रवेशपत्र किंवा अर्ज प्रक्रियेबाबत कोणतीही घोषणा करण्यात आलेली नाही.
MAHATET 2026 संदर्भातील पुढील अधिकृत वेळापत्रक, परीक्षा दिनांक आणि इतर सूचना महाराष्ट्र राज्य परीक्षा परिषदेकडून स्वतंत्रपणे जाहीर केल्या जाण्याची शक्यता आहे. त्यामुळे उमेदवारांनी अधिकृत घोषणांकडे लक्ष ठेवणे आवश्यक आहे.
