राज्यातील सार्वजनिक आरोग्य व्यवस्था अधिक सक्षम करण्यासाठी आरोग्य विभागातील आवश्यक मनुष्यबळ तातडीने उपलब्ध करून देण्यासोबतच प्रलंबित पदभरती आणि पदोन्नतीच्या प्रक्रियेला गती देण्याचे निर्देश सार्वजनिक आरोग्य व कुटुंब कल्याण मंत्री प्रकाश आबिटकर यांनी दिले.
आरोग्य भवन येथे आयोजित बैठकीत आरोग्य विभागातील आस्थापना विषयक विविध बाबींचा सविस्तर आढावा घेण्यात आला. या बैठकीत रिक्त पदे, नवीन पदभरती, कर्मचाऱ्यांच्या पदोन्नती, अधिपरिचारिका संवर्गातील प्रश्न तसेच राष्ट्रीय आरोग्य अभियानातील (NHM) कर्मचाऱ्यांच्या विविध बाबींवर चर्चा करण्यात आली.
आरोग्य विभागातील रिक्त पदांचा आढावा
आरोग्य विभागातील गट-क आणि गट-ड संवर्गातील नवीन पदभरतीच्या सद्यस्थितीचा तसेच विविध संवर्गांतील रिक्त पदांचा बैठकीत आढावा घेण्यात आला. आरोग्य सेवेसाठी आवश्यक असलेले मनुष्यबळ उपलब्ध व्हावे यासाठी तातडीने कार्यवाही करण्याच्या सूचना मंत्री आबिटकर यांनी अधिकाऱ्यांना दिल्या.
पदभरतीची प्रक्रिया अनावश्यक विलंब न करता पूर्ण करण्याचे निर्देशही त्यांनी दिले. आरोग्य विभागातील रिक्त पदांमुळे नागरिकांना आरोग्यसेवा देताना अडचणी निर्माण होऊ नयेत, यासाठी आवश्यक मनुष्यबळ उपलब्ध करून देण्यावर बैठकीत भर देण्यात आला.
अधिपरिचारिका कर्मचाऱ्यांच्या पदोन्नतीला गती
अधिपरिचारिका (Nursing) संवर्गातील कर्मचाऱ्यांच्या विविध अडचणी, परिविक्षाधीन कालावधीची पूर्तता आणि पदोन्नतीच्या विषयांवरही चर्चा करण्यात आली.
कर्मचाऱ्यांच्या पदोन्नतीचे प्रस्ताव अनावश्यकपणे प्रलंबित राहणार नाहीत, याची दक्षता घेण्याच्या सूचना देण्यात आल्या. पदोन्नतीची प्रक्रिया जलदगतीने पूर्ण करून कर्मचाऱ्यांना त्यांच्या सेवाकालात योग्य संधी उपलब्ध करून देणे आवश्यक असल्याचे मंत्री आबिटकर यांनी स्पष्ट केले.
NHM कर्मचाऱ्यांच्या प्रश्नांचाही आढावा
राष्ट्रीय आरोग्य अभियानातील (NHM) कर्मचाऱ्यांच्या समावेशनासंदर्भातील विविध बाबींचाही बैठकीत आढावा घेण्यात आला. आरोग्य सेवेत कार्यरत असलेल्या कर्मचाऱ्यांच्या प्रश्नांचा नियमांनुसार आणि सकारात्मक दृष्टिकोनातून विचार करून आवश्यक कार्यवाही करण्याच्या सूचना संबंधित अधिकाऱ्यांना देण्यात आल्या.
फाईल प्रलंबित ठेवण्यावर नाराजी
प्रशासनातील कोणत्याही प्रकरणात अनावश्यक विलंब होऊ नये, यासाठी प्रत्येक स्तरावर जबाबदारी निश्चित करून कामकाज करण्याचे निर्देश मंत्री आबिटकर यांनी दिले.
तालुका आरोग्य अधिकारी पदाच्या कर्तव्य व जबाबदारी निश्चितीबाबत सुरू असलेल्या कार्यवाहीचाही यावेळी आढावा घेण्यात आला. तसेच जिल्हा हिवताप अधिकारी संवर्गातील हिवताप कर्मचाऱ्यांमधून पदोन्नतीने नियुक्ती देण्यासंदर्भातील कार्यवाहीवरही चर्चा झाली.
चांगल्या कामाला प्रोत्साहन, हलगर्जीपणावर कारवाई
आरोग्य विभागातील अधिकारी आणि कर्मचाऱ्यांनी नागरिकांना केंद्रस्थानी ठेवून कार्यक्षमतेने काम करणे आवश्यक असल्याचे मंत्री आबिटकर यांनी सांगितले.
चांगले काम करणाऱ्या अधिकारी-कर्मचाऱ्यांना प्रोत्साहन देण्यात यावे. मात्र, कामात हलगर्जीपणा किंवा दिरंगाई करणाऱ्यांवर नियमानुसार कारवाई करण्यात यावी, असे स्पष्ट निर्देश त्यांनी दिले.
प्रलंबित बाबी तातडीने मार्गी लावण्याच्या सूचना
आरोग्य विभागातील विविध आस्थापना विषयक प्रश्न आणि प्रलंबित बाबींचा वेगाने निपटारा करून प्रशासन अधिक गतिमान, पारदर्शक आणि परिणामकारक करण्यावर बैठकीत भर देण्यात आला.
आरोग्य विभागाच्या कामकाजाचा थेट परिणाम सर्वसामान्य नागरिकांच्या आरोग्यावर होत असल्याने कोणत्याही स्तरावर दिरंगाई खपवून घेतली जाणार नाही, असे मंत्री आबिटकर यांनी स्पष्ट केले. नागरिकांना वेळेत आणि दर्जेदार आरोग्यसेवा मिळण्यासाठी सर्व संबंधित विभागांनी समन्वयाने काम करण्याचे आवाहनही त्यांनी केले.
बैठकीस आरोग्य विभागातील संबंधित वरिष्ठ अधिकारी उपस्थित होते. बैठकीतील निर्णयांची प्रभावी अंमलबजावणी करून प्रलंबित बाबी तातडीने मार्गी लावण्याच्या सूचनाही यावेळी देण्यात आल्या.
