Pavitra Portal: शिक्षण सेवक भरतीच्या प्रतीक्षेत असलेल्या आणि TAIT-2025 परीक्षा दिलेल्या उमेदवारांसाठी शिक्षण विभागाने अत्यंत महत्त्वाच्या 5 सूचना जारी केल्या आहेत. पवित्र पोर्टलवर स्व-प्रमाणपत्र (Self-Certification) भरताना अनेक उमेदवारांना तांत्रिक अडचणी आणि आरक्षणाबाबत संभ्रम होता.
यावर उपाय म्हणून विभागाने दिनांक २६ डिसेंबर २०२५ रोजी नवीन परिपत्रक काढून मोबाईल नंबर बदलण्यापासून ते CTET गुणांच्या नोंदीपर्यंत अनेक गोष्टी स्पष्ट केल्या आहेत. सविस्तर वाचा.
Pavitra Portal उमेदवारांसाठी 5 महत्त्वाच्या सूचना
शिक्षक अभियोग्यता व बुद्धिमत्ता चाचणी (TAIT-2025) दिलेल्या उमेदवारांसाठी पवित्र पोर्टलवर नोंदणी प्रक्रिया सुरू आहे. मात्र, ही प्रक्रिया पूर्ण करताना उमेदवारांना येणाऱ्या अडचणी लक्षात घेऊन विभागाने काही महत्त्वपूर्ण बदल आणि स्पष्टीकरणे दिली आहेत.
बंद पडलेला मोबाईल नंबर आता बदलता येणार (Mobile Number Update)
पवित्र पोर्टलवर लॉगिन करण्यासाठी आणि स्व-प्रमाणपत्रासाठी OTP आवश्यक असतो. अनेक उमेदवारांनी परीक्षेच्या वेळी दिलेला मोबाईल नंबर आता बंद पडला आहे किंवा हरवला आहे, त्यामुळे त्यांना लॉगिन करता येत नव्हते. अशा उमेदवारांसाठी विभागाने ई-मेलद्वारे नंबर बदलण्याची सुविधा दिली आहे.
मोबाईल नंबर अपडेट करण्यासाठी काय करावे?
ज्यांचा जुना नंबर बंद आहे, त्यांनी TAIT-2025 साठी नोंदणी केलेल्या आपल्या ई-मेल आयडीवरून edupavitra25@gmail.com या ई-मेलवर विनंती अर्ज पाठवावा.
ई-मेलच्या ‘Subject’ मध्ये “Update/Change Mobile number” असे लिहावे. सोबत खालील कागदपत्रे जोडणे अनिवार्य आहे:
- विनंती अर्ज.
- ओळखीचा पुरावा (आधार कार्ड/पॅनकार्ड/ड्रायव्हिंग लायसन्स यापैकी एक).
- परीक्षा क्रमांक (Exam Number).
- TAIT-2025 नोंदणी क्रमांक (Registration Number).
- नवीन मोबाईल क्रमांक.
TET आणि CTET समकक्ष: शिक्षक भरतीसाठी (PAVITRA Portal) केंद्रीय पात्रता परीक्षा वैध
CTET आणि आरक्षणाचा मुद्दा स्पष्ट
खुल्या प्रवर्गातील (Open Category) ज्या उमेदवारांना केंद्रीय शिक्षक पात्रता परीक्षेत (CTET) ५५% ते ६०% गुण आहेत, त्यांच्या प्रमाणपत्रावर ‘Not Qualified’ असे नमूद असते. अशा उमेदवारांच्या मनात स्व-प्रमाणपत्रात गुण नोंदवण्याबाबत संभ्रम होता.
विभागाने स्पष्ट केले आहे की, ज्या उमेदवारांकडे CTET परीक्षेचा अर्ज भरताना आरक्षणाचे (Caste/Category) प्रमाणपत्र उपलब्ध होते, त्यांनाच सवलत मिळेल.
मात्र, जर अर्ज भरताना तुमच्याकडे आरक्षणाचे प्रमाणपत्र नव्हते, तर तुम्हाला आता सवलतीचा लाभ घेता येणार नाही. अशा उमेदवारांनी ५५% ते ६०% गुण असल्यास त्याची नोंद करू नये, अन्यथा होणाऱ्या कारवाईस उमेदवार जबाबदार असतील.
NCL आणि EWS प्रमाणपत्राबाबत सूचना
उमेदवारांनी नॉन-क्रिमी लेअर (NCL) आणि आर्थिकदृष्ट्या दुर्बल घटकाचे (EWS) प्रमाणपत्र सादर करताना ते सन २०२५-२६ या आर्थिक वर्षासाठी ग्राह्य असणे आवश्यक आहे. पोर्टलवर माहिती भरताना हीच प्रमाणपत्रे अपलोड करावीत.
समांतर आरक्षणाचा लाभ एकदाच
जर एखाद्या उमेदवाराने यापूर्वीच प्रकल्पग्रस्त, भूकंपग्रस्त किंवा माजी सैनिक यांसारख्या समांतर आरक्षणाचा लाभ घेऊन शासकीय नोकरी मिळवली असेल, तर त्यांना पुन्हा त्या प्रमाणपत्राचा लाभ घेता येणार नाही.
अशा उमेदवारांनी TAIT-2025 मध्ये सहभागी होताना आपल्या मूळ प्रवर्गातून किंवा खुल्या प्रवर्गातून (Open) अर्ज करावा.
अर्जात चूक झाली? काळजी नको
अनेकदा घाईगडबडीत उमेदवारांकडून माहिती भरताना चुका होतात आणि अर्ज ‘Self Certified’ केला जातो. आता अशा उमेदवारांना दिलासा मिळाला आहे. जर तुमच्या अर्जात चूक झाली असेल, तर तुम्ही तुमचे स्व-प्रमाणपत्र ‘Uncertify’ करू शकता. त्यानंतर योग्य दुरुस्ती करून पुन्हा ते ‘Self Certified’ करणे आवश्यक आहे.
उमेदवारांनी या सर्व सूचनांचे काटेकोरपणे पालन करावे, जेणेकरून नोकरीच्या संधीत कोणतीही तांत्रिक अडचण येणार नाही.
अधिक माहितीसाठी : पवित्र पोर्टलवर उमेदवारांसाठी महत्त्वाच्या सूचना डाउनलोड करा
अधिकृत वेबसाईट : https://tait2025.mahateacherrecruitment.org.in/
