FYJC Cap Round 1 Date: महाराष्ट्रामध्ये दहावीचा निकाल लागल्यानंतर सर्व विद्यार्थी आणि पालकांचे लक्ष अकरावीच्या प्रवेश प्रक्रियेकडे लागलेले असते. शिक्षण संचालनालय, पुणे यांच्यामार्फत सन २०२६-२७ या शैक्षणिक वर्षासाठी इयत्ता ११ वी ची केंद्रीय ऑनलाईन प्रवेश प्रक्रिया mahafyjcadmissions.in या अधिकृत वेब पोर्टल वर सुरू करण्यात आली आहे. या वर्षी लाखो विद्यार्थ्यांनी नोंदणी केली असून, सर्वांना पहिल्या नियमित फेरीची (FYJC Cap Round 1) उत्सुकता आहे.
FYJC Latest Update
भाग १ आणि भाग २ चे अर्ज भरताना एसएससी बोर्डाची गुणपत्रिका आणि शाळा सोडल्याचा दाखला अनिवार्य नाही.
CAP फेरी १ – भाग १ आणि भाग २, CAP आणि कोटा पर्याय अर्ज भरणे, विद्यार्थी नोंदणीसह, २१ मे २०२६ रोजी सकाळी ८:०० वाजल्यापासून सुरू होईल आणि २३ मे २०२६ रोजी सायंकाळी ६:०० वाजेपर्यंत सुरू राहील.
FYJC Cap Round 1 सविस्तर वेळापत्रक
FYJC Cap Round 1 Date: 11 वीच्या प्रवेशासाठी पहिली फेरी अत्यंत महत्त्वाची मानली जाते. अधिकृत वेळापत्रकानुसार या फेरीसाठी नवीन विद्यार्थ्यांची नोंदणी, भाग १ मधील आवश्यक बदल आणि भाग २ (पसंतीक्रम) भरण्याची प्रक्रिया २१ मे २०२६ रोजी सकाळी ८ वाजेपासून सुरू होणार आहे. ही मुदत २३ मे २०२६ रोजी सायंकाळी ६ वाजेपर्यंतच असणार आहे.
या वेळेत विद्यार्थ्यांना किमान एक आणि जास्तीत जास्त दहा कनिष्ठ महाविद्यालयांचे पसंतीक्रम ऑनलाईन नोंदवायचे आहेत. याच कालावधीत कोटा आणि अल्पसंख्याक प्रवेशासाठी (इन-हाऊस, व्यवस्थापन कोटा) देखील ऑनलाईन नोंदणी करून फॉर्म लॉक करणे आवश्यक आहे.
Std. 11th Centralized Online Admission Process 2026 – 27 Student CAP Addmission User Manual
त्यानंतर २३ मे ते २६ मे २०२६ या दरम्यान प्रवेशाची अलॉटमेंट प्रक्रिया पार पडेल. प्रत्यक्ष वाटप यादी, म्हणजेच कोणत्या विद्यार्थ्याला कोणते महाविद्यालय मिळाले याची सविस्तर माहिती २६ मे रोजी पोर्टलवर प्रसिद्ध केली जाईल. सोबतच कटऑफ यादी देखील जाहीर होईल आणि विद्यार्थ्यांना एसएमएसद्वारे याची पूर्वकल्पना दिली जाईल.
प्रत्यक्ष प्रवेश निश्चिती आणि पुढील टप्पे
ज्या विद्यार्थ्यांना FYJC Cap Round 1 मध्ये त्यांच्या पसंतीचे किंवा गुणवत्तेनुसार महाविद्यालय मिळेल, त्यांनी पुढील प्रवेश प्रक्रिया दिलेल्या वेळेत पूर्ण करणे गरजेचे आहे. २६ मे ते २८ मे २०२६ या कालावधीत विद्यार्थ्यांना मिळालेल्या महाविद्यालयासाठी ऑनलाईन ‘Proceed for admission’ हा पर्याय निवडून आपला प्रवेश निश्चित करायचा आहे.
यासाठी प्रत्यक्ष महाविद्यालयात उपस्थित राहून आवश्यक त्या सर्व मूळ कागदपत्रांची पडताळणी करणे आणि विहित शुल्क भरणे अनिवार्य आहे. जर एखाद्या विद्यार्थ्याला मिळालेल्या महाविद्यालयात प्रवेश घ्यायचा नसेल, तर ते ऑनलाईन लॉगीनवरून आपला प्रवेश रद्द देखील करू शकतात.
पहिल्या फेरीची ही सर्व प्रक्रिया पूर्ण झाल्यानंतर, २९ मे रोजी रिक्त राहिलेल्या जागांचा तपशील पोर्टलवर जाहीर केला जाईल आणि दुसऱ्या दिवशी म्हणजेच ३० मे २०२६ रोजी दुसऱ्या फेरीचे वेळापत्रक प्रसिद्ध करण्यात येईल.
राज्यातील प्रवेश प्रक्रियेची सद्यस्थिती आणि आकडेवारी
या वर्षी अकरावी प्रवेशासाठी राज्याभरातून विद्यार्थ्यांचा मोठा प्रतिसाद मिळत आहे. प्रवेश पोर्टलवर उपलब्ध असलेल्या ताज्या आकडेवारीनुसार, एकूण ९२६३ महाविद्यालयांमध्ये ही ऑनलाईन प्रवेश प्रक्रिया राबवली जात आहे.
अकरावी प्रवेश पोर्टलवरील डॅशबोर्डनुसार राज्यातील प्रवेश प्रक्रियेची 20 मे 2026 पर्यंतची सद्यस्थिती आणि महत्त्वाची आकडेवारी खालीलप्रमाणे आहे.
- एकूण महाविद्यालये: ९,२६३
- नोंदणी केलेले विद्यार्थी: ९,५४,८६७
- कॅप (CAP) जागांची क्षमता: १६,१०,२९३
- कॅप (CAP) मधील रिक्त जागा: १६,१०,२९३
- कोटा अंतर्गत प्रवेश क्षमता: ४,५९,६५३
- कोटा अंतर्गत झालेले प्रवेश: ३९,६१३
- कोटा अंतर्गत रिक्त जागा: ४,२०,०४०
- एकूण प्रवेश क्षमता: २०,६९,९४६
- एकूण झालेले प्रवेश: ३९,६१३
- एकूण रिक्त जागा: २०,३०,३३३
आतापर्यंत जवळपास ९ लाख ५४ हजार ८६७ विद्यार्थ्यांनी या प्रक्रियेसाठी आपली नोंदणी यशस्वीरित्या पूर्ण केली आहे. उपलब्ध जागांचा विचार केल्यास, कॅप (CAP) जागांची एकूण क्षमता १६ लाख १० हजार २९३ इतकी मोठी आहे, तर विविध कोटा अंतर्गत ४ लाख ५९ हजार ६५३ जागा प्रवेशासाठी उपलब्ध आहेत.
एकूणच उपलब्ध जागांचे प्रमाण विद्यार्थ्यांच्या संख्येपेक्षा जास्त असल्याने प्रवेशाबाबत चिंता करण्याचे कारण नाही, परंतु योग्य महाविद्यालयांचा पसंतीक्रम अचूकपणे भरणे मात्र अत्यंत आवश्यक आहे.
विद्यार्थ्यांनी आणि पालकांनी शेवटच्या क्षणाची वाट न पाहता दिलेल्या मुदतीतच आपले अर्ज भरावेत. पुढील प्रवेश प्रक्रियेसाठी आणि अधिक माहितीसाठी अधिकृत वेबसाईटला नियमित भेट देत राहा. सर्व विद्यार्थ्यांना त्यांच्या अकरावी प्रवेशासाठी आणि पुढील शैक्षणिक वाटचालीसाठी खूप खूप शुभेच्छा!
अधिक माहितीसाठी : https://mahafyjcadmissions.in/
