राज्यातील गुणवंत खेळाडूंना शासकीय व निमशासकीय सेवांमधील 5 टक्के आरक्षणाचा लाभ अधिक सुलभ, पारदर्शक आणि जलद गतीने मिळावा यासाठी क्रीडा व युवक सेवा संचालनालयाने ‘क्रीडा ई-प्रमाण’ ही ब्लॉकचेन तंत्रज्ञानावर आधारित अद्ययावत डिजिटल प्रणाली सुरू केली आहे. या प्रणालीद्वारे खेळाडूंना QR कोडसह डिजिटल प्रमाणपत्र मिळणार असून त्याची पडताळणी नियुक्ती प्राधिकरणांना त्वरित करता येणार आहे.
क्रीडा ई-प्रमाण प्रणाली काय आहे?
राज्यातील खेळाडूंना शासकीय व निमशासकीय सेवांमध्ये 5 टक्के आरक्षणाचा लाभ मिळवण्यासाठी आवश्यक असलेली प्रमाणपत्रे आता ‘क्रीडा ई-प्रमाण’ या डिजिटल प्रणालीद्वारे उपलब्ध करून देण्यात येणार आहेत. ही प्रणाली ब्लॉकचेन तंत्रज्ञानावर आधारित असल्यामुळे प्रमाणपत्रांची पडताळणी सुरक्षित आणि पारदर्शक पद्धतीने करता येणार आहे.
या प्रणालीद्वारे खेळाडूंना डिजिटल पडताळणीसह प्रमाणपत्र मिळणार असून त्यावर QR कोड असणार आहे. त्यामुळे संबंधित नियुक्ती प्राधिकरणांना प्रमाणपत्राची सत्यता त्वरित तपासता येणार आहे.
भरती अर्जासाठी ई-प्रमाणपत्र अनिवार्य
महाराष्ट्र लोकसेवा आयोग (MPSC) तसेच इतर सर्व शासकीय पदभरतीसाठी अर्ज करताना खेळाडूंनी ‘क्रीडा ई-प्रमाणपत्र’ जोडणे अनिवार्य करण्यात आले आहे. त्यामुळे खेळाडूंनी या प्रणालीवर नोंदणी करून डिजिटल प्रमाणपत्र प्राप्त करून घेणे आवश्यक आहे.
माहिती उपलब्ध नसल्यास काय करावे?
जर एखाद्या खेळाडूची माहिती प्रणालीवर उपलब्ध नसल्यास त्यांनी खालील माहिती ई-मेलद्वारे पाठवावी –
- स्पर्धेचे नाव
- स्पर्धेचे वर्ष
- प्रमाणपत्राची स्कॅन प्रत
ई-मेल : support@kridaepramaan.org यानंतर विभागस्तरावर पडताळणी करून अभिलेख पोर्टलवर अद्ययावत केले जातील.
क्रीडा ई-प्रमाणपत्र कसे मिळवायचे?
खेळाडूंनी खालील पद्धतीने ई-प्रमाणपत्र मिळवू शकतात –
- https://sports.maharashtra.gov.in या संकेतस्थळाला भेट द्यावी.
- ‘क्रीडा ई-प्रमाणपत्र’ या पर्यायावर जाऊन अर्ज करावा.
- अर्जाची पडताळणी झाल्यानंतर डिजिटल प्रमाणपत्र उपलब्ध होईल.
सध्या कोणत्या खेळांचे अभिलेख उपलब्ध?
सद्यस्थितीत खालील खेळांच्या स्पर्धांचे अभिलेख ऑनलाईन उपलब्ध आहेत –
- कबड्डी
- फेन्सिंग
- ट्रायथलॉन (2025)
- ज्युडो (2024)
- कुराश (2024-25 व 2017-18)
इतर खेळांचे अभिलेख देखील टप्प्याटप्प्याने पोर्टलवर अपलोड करण्याचे काम सुरू आहे.
आधी पडताळणी केलेल्या खेळाडूंनाही अर्ज आवश्यक
यापूर्वी विभागीय उपसंचालक, क्रीडा व युवक सेवा यांच्या कार्यालयामार्फत प्रमाणपत्रांची पडताळणी झालेल्या खेळाडूंनी देखील पुढील भरती प्रक्रियेसाठी या प्रणालीद्वारे डिजिटल प्रमाणपत्र तयार करून घेणे आवश्यक असल्याचे क्रीडा व युवक सेवा संचालनालयाने आवाहन केले आहे.
‘क्रीडा ई-प्रमाण’ प्रणालीमुळे खेळाडूंना नोकरीतील 5 टक्के आरक्षणासाठी लागणारी प्रमाणपत्रे डिजिटल, सुरक्षित आणि जलद पद्धतीने उपलब्ध होणार आहेत. QR कोड आधारित पडताळणीमुळे प्रमाणपत्रांची सत्यता तपासणे सोपे होणार असून भरती प्रक्रियेत पारदर्शकता वाढण्यास मदत होणार आहे.
हे ही वाचा: खेळाडूंना आता सरकारी नोकरीसाठी 5 टक्के आरक्षण लागू शासन निर्णय
