RTE Online Application Instructions : आरटीई 25 टक्के प्रवेश प्रक्रिया 2026-27 या वर्षाकरिता पालकांनी अर्ज भरण्यास 17 फेब्रुवारी 2026 पासून सुरुवात झाली आहे. राज्यातील RTE प्रवेश प्रक्रिया संदर्भात आता 3km पर्यंतच्या शाळा निवड करता येणार आहे. याबाबतच्या सुधारित सूचना RTE 25% Admission Portal वर जारी करण्यात आल्या आहेत. याबाबत सविस्तर माहिती पाहूया.
आरटीई 25% चे ऑनलाईन प्रवेश अर्जाची स्थिती पाहत असताना सर्व्हरच्या क्षमतेपलीकडे जाऊन पोर्टल स्लो होऊ शकते त्यामुळे पालकांनी संभ्रमात न पडता काही वेळाने पुन्हा प्रयत्न करावा.
आरटीई 25 टक्के प्रवेश पालकांकरीता सुधारित सूचना (2026-2027)
RTE 25 टक्के प्रवेशासाठी अर्ज भरण्यासाठी असलेली 1 किलोमीटरची अट रद्द करण्यात आलेली आहे. त्यामुळे ज्या पालकांनी 1 किलोमीटरच्या आत असलेल्या शाळांची निवड करून फॉर्म सबमिट केला आहे, तसेच ज्या पालकांनी / विद्यार्थ्यांनी RTE 25% प्रवेशासाठी नोंदणी केली आहे, त्यांना आता प्रवेशासाठी 1 किमी, 1 ते 3 किमी तसेच 3 किमी पेक्षा अधिक अंतरावरील शाळा उपलब्ध झाल्या आहेत. या अनुषंगाने संबंधित पालकांना पालक लॉगिनमध्ये Unconfirm करण्याची सुविधा उपलब्ध करून देण्यात आली आहे.त्यामुळे सर्व संबंधितांनी आपला सादर केलेला फॉर्म Unconfirm करून आवश्यक ती सुधारित माहिती नोंदवावी.
1) आर.टी.ई. प्रवेश प्रक्रिया 2026-2027 या वर्षाकरिता पालकांनी अर्ज भरण्यास सुरुवात झाली आहे. पालकांनी पुढील सूचना पाळूनच अर्ज भरून पूर्ण करावा.
2) पालकांनी अर्ज भरताना आपल्या राहत्या निवासाचा पूर्ण पत्ता आणि Google Location पुन्हा पुन्हा तपासून पाहावे .पूर्ण अर्ज बरोबर असल्याची खात्री झाल्या शिवाय अर्ज सबमिट करू नये.
3) आपल्या बालकाचा अर्ज भरत असताना जन्मदाखल्यावरीलच जन्म दिनांक लिहावा. एकदा भरलेली जन्मतारीख पुन्हा बदलता येणार नाही !
4) प्रवेश पात्रतेसाठी आवश्यक असणारी सर्व कागदपत्रे फॉर्म सबमिट करताना अपलोड करणे आवश्यक आहे.
5) अर्ज भरत असताना आवश्यक कागदपत्र पालकांनी तयार ठेवावेत. लॉटरी लागली आणि कागदपत्र नसतील तर प्रवेश रद्द होऊ शकतो याची नोंद घ्यावी.
6) अर्ज भरून झाल्यावर जर तो चुकला आहे असे समजले तर पहिला अर्ज सबमिट करण्यापूर्वी डिलीट करावा आणि नवीन अर्ज भरावा.
7) एका पालकाने आपल्या बालकासाठी डुप्लिकेट अर्ज भरू नये. एकाच बालकाचे २ अर्ज आढळून आल्यास त्या बालकाचे दोन्ही अर्ज बाद होतील व ते अर्ज लॉटरी प्रक्रियेमध्ये समाविष्ट केले जाणार नाहीत.
8) अर्ज भरल्यावर पालकांनी अर्ज क्रमांक , अर्जात लिहिलेला मोबाइल नंबर आणि अर्जाची प्रत स्वत: जवळ लॉटरी प्रक्रिया होईपर्यंत जपून ठेवावी.
9) अर्ज भरत असताना अर्जातील माहिती खोटी अथवा चुकीची आढळल्यास मिळालेला प्रवेश रद्द होईल.
10) अर्ज करताना पासवर्ड विसरल्यास तो Recover Password यावर क्लिक करून रिसेट करावा .
11) RTE २५ % प्रवेश 2026-2027 या वर्षाकरिता पालकांनी अर्ज भरण्याची मुदत 31/03/2026 पर्यंत राहील.
12) दिव्यांग बालकांना अर्ज करण्यासाठी दिव्यांगत्वाचे प्रमाणपत्र 40% आणि त्या पुढील ग्राह्य धरण्यात येईल.
13) सन 2026-2027 या वर्षाकरिता निवासी पुरावा म्हणून गॅस बुक रद्द करण्यात येत आहे .
14) सन 2026-2027 या वर्षाकरिता निवासी पुरावा म्हणून बँकेचे पासबूक दिल्यास फक्त राष्ट्रीय कृत बँकेचेच पासबुक ग्राह्य धरण्यात येणार आहे.
15) अर्ज भरताना location चुकू नये म्हणून Google Map वर पत्ता टाकून मिळालेले Lattitude,Longitude प्रवेश अर्जावर टाकल्यास location चुकणार नाही.
16) बालकाच्या जन्मतारखेबाबत : दिव्यांग बालकाचा अर्ज भरत असताना जन्मतारखेबाबत काही समस्या आल्यास त्वरित rtemah2020@gmail.com वर इमेल पाठवावा.
अधिकृत वेबसाईट : https://student.maharashtra.gov.in/adm_portal/
आरटीई प्रवेशाबाबत अधिक सविस्तर माहितीसाठी RTE Admission Maharashtra 2026-27 संपूर्ण माहितीचा लेख अवश्य वाचा.
