केंद्रप्रमुख जिल्हानिहाय निवड यादी तयार करणे आणि नियुक्ती प्रक्रिया राबविण्याबाबतचे निर्देश जारी

Kendrapramukh Bharti Update 2026 : केंद्रप्रमुख मर्यादित विभागीय स्पर्धा परीक्षा २०२५ च्या (Kendrapramukh Exam 2025) निकालानंतर आता जिल्हानिहाय निवड यादी तयार करणे आणि नियुक्ती प्रक्रिया राबविण्याबाबतचे निर्देश ४ जून २०२६ रोजीच्या शासन पत्रान्वये जारी करण्यात आले आहेत. शिक्षण संचालकांकडून यादी प्राप्त झाल्यानंतर अवघ्या दोन दिवसांत संबंधित जिल्हा परिषदेच्या मुख्य कार्यकारी अधिकाऱ्यांना ती उपलब्ध करून द्यावी लागणार आहे.

या प्रक्रियेत पारदर्शकता आणि वेग राखण्यासाठी प्रशासनाने अत्यंत काटेकोर नियोजन केले आहे. शिक्षण संचालक कार्यालयाकडून उमेदवारांची यादी प्राप्त झाल्यावर मुख्य कार्यकारी अधिकाऱ्यांनी ती उमेदवारांच्या गुणांच्या उतरत्या क्रमाने असल्याची खात्री करणे आवश्यक आहे.

केंद्रप्रमुख निवड कागदपत्र पडताळणी

त्यानंतर जाहिरातीत नमूद असलेल्या एकूण पदांच्या अडीच पट उमेदवारांना कागदपत्र पडताळणीसाठी (Document Verification) बोलावण्यात येणार आहे. उमेदवारांना ही यादी उपलब्ध झाल्यापासून केवळ पाच दिवसांच्या आत एका विशिष्ट दिनांकावर मूळ कागदपत्रांसह उपस्थित राहावे लागेल.

सर्वसाधारण आणि दिव्यांग प्रवर्गासाठी स्वतंत्रपणे गुणवत्ता यादीनुसार आणि अडीच पट उमेदवारांचा निकष लावून ही संपूर्ण प्रक्रिया राबविली जाणार आहे.

कागदपत्र पडताळणीच्या वेळी उमेदवारांना आपली शैक्षणिक व व्यावसायिक अर्हता, टीईटी किंवा सीटीईटी प्रमाणपत्र, मागील पाच वर्षांचे गोपनीय अहवाल आणि नियुक्ती आदेश अशा आवश्यक बाबी सादर कराव्या लागतील.

हे ही वाचा: केंद्रप्रमुख निकालानंतर उमेदवारांची मेरिट कशी ठरणार? जिल्हानिहाय कट-ऑफ किती?

TET किंवा CTET प्रमाणपत्राच्या अधिकृततेबाबत उमेदवारांकडून हमीपत्र घेतले जाणार असून, उमेदवारावर कोणतीही विभागीय चौकशी किंवा फौजदारी प्रकरण प्रलंबित नसल्याचे सक्षम प्राधिकाऱ्याचे प्रमाणपत्रही अनिवार्य करण्यात आले आहे.

हिंदी आणि मराठी भाषा परीक्षा उत्तीर्ण प्रमाणपत्र किंवा स्थायित्व लाभ प्रमाणपत्र जर उमेदवाराकडे सध्या उपलब्ध नसेल, तर काळजी करण्याचे कारण नाही; उमेदवारांना नियुक्तीच्या दिनांकापासून तीन महिन्यांच्या आत ते सादर करण्याची सवलत एका हमीपत्राच्या आधारावर देण्यात आली आहे. या सर्व पडताळणी प्रक्रियेनंतर अवघ्या दोन दिवसांत अंतिम निवड सूची तयार करून, पुढील दोन दिवसांत समुपदेशनाने पदस्थापनेचे आदेश निर्गमित केले जाणार आहेत.

या नियुक्ती प्रक्रियेत भाग घेणाऱ्या शिक्षकांसाठी (ZP Teacher Update) शासनाने निर्धारित केलेली विहित पात्रता पूर्ण करणे बंधनकारक असणार आहे.

यामध्ये प्रामुख्याने १ जानेवारी २०२६ पर्यंत संबंधित पदावर सलग ६ वर्षे सेवा पूर्ण केलेली असणे आणि ३ फेब्रुवारी २०२६ पर्यंत टीईटी किंवा सीटीईटी परीक्षा उत्तीर्ण असणे समाविष्ट आहे. उमेदवारांना दिले जाणारे नियुक्ती आदेश हे सर्वोच्च न्यायालयात प्रलंबित असलेल्या विशेष अनुमती याचिका क्रमांक १४०१६-१४०१९/२०२६ च्या अंतिम न्यायनिर्णयाच्या अधीन राहून दिले जातील, ज्याचा उल्लेख नियुक्ती आदेशात स्पष्टपणे करावा लागणार आहे.

सर्वात महत्त्वाची आणि सकारात्मक बाब म्हणजे, ही निवड प्रक्रिया पूर्ण झाल्यानंतर जिल्हा परिषदांच्या आस्थापनेवरील सुमारे २४०० पदे रिक्त होतील आणि ती सर्व पदे पवित्र पोर्टल द्वारे सध्या सुरु असलेल्या शिक्षक पदभरतीसाठी उपलब्ध होऊ शकणार आहेत.